– Det er med ekte, djup sorg vi alle har motteke bodskapen om at Hans Majestet Kong Harald V har gått bort
Kong Harald si kongsgjerning vart å byggje det moderne Noreg, der menneske med alle sine ulikskapar lever saman i respekt for kvarande. Kongen vår inspirerte oss alle til å bli betre menneske og medmenneske. Kong Harald var den største humanisten eg kan tenkje meg, så saknet er stort i Noreg no, seier fylkesordførar Jon Askeland.
Det er med ekte, djup sorg vi alle har motteke bodskapen om at Hans Majestet Kong Harald V har gått bort. Samstundes kjenner eg på den store takksemda over kor utruleg heldige vi har vore som har hatt ein slik fantastisk folkekonge. Kong Harald framstår for meg som den klokaste av oss alle. Med sitt varme hjarta, sin enorme kunnskap og lune humor, inspirerte Kongen oss alle i møte og talar. Kongen var ein meister til å appellere til det gode i oss. Kong Harald var ei samlande kraft og leia landet vårt gjennom sorg og glede på ein måte som han vil bli hugsa for gjennom generasjonar framover.
På vegner av oss alle i Vestland, sender eg varme kondolansar til Hennar Majestet Dronning Sonja og kongefamilien.
Det seier fylkesordførar Jon Askeland på vegner av Vestland fylkeskommune og alle innbyggarane i Vestland.
Kondolanseprotokollar
Kondolanseprotokollar er tilgjengelege for alle som vil skrive ei siste helsing til Hans Majestet Kong Harald V. Dei ligg i resepsjonane i fylkeshusa i Bergen, Førde og på Leikanger, og også på dei vidaregåande skulane i fylket.
Dei vidaregåande skulane vil ha ei samling for elevane, og kontaktlærarane er tilgjengelege dersom nokon har behov for å snakke.
Fylkeshuset i Bergen er i Vestlandshuset i Lars Hillesgate 22. Fylkeshuset på Leikanger er i Askedalen 2, og i Førde er adressa Storehagen 1b. Resepsjonane på administrasjonsstadane er opne alle kvardagar mellom kl. 8 og kl. 15.
Oppdatert: 28. august 2026 kl. 14.37.