Vil få 15 000 fleire i jobb – Vestland tar grep mot utanforskap

– For å møte behovet for arbeidskraft i åra framover treng vi alle i jobb – både i by og i distrikt. Utanforskap er ei av dei største samfunnsutfordringane, både for enkeltmenneske og for Vestland som fylke. Med dette prosjektet vil vi samle kreftene og finne løysingar som varer. Vi skal gjere meir av det som verkar, samarbeide tettare og dele dei gode løysingane, seier fylkesordførar Jon Askeland om satsinga. 

«Inkludering i Vest» tek utgangspunkt i eit nasjonalt utfordringsbilete med demografiske endringar, og det at fleire og fleire står utanfor arbeidslivet. Det overordna målet er å auke sysselsetjinga blant grupper som ikkje deltek i arbeidslivet, og å førebyggje utanforskap.  

– Vår største formue er folka våre 

Prosjektet vart offisielt lansert på Vestlandshuset i dag, med arbeids- og inkluderingsminister Kjersti Stenseng og sentrale aktørar innan arbeidsinkludering til stades. Her vart det presentert både statistikk over utviklinga i utanforskap og ei kartlegging av aktørar og ulike tiltak i fylket.

Sjå kickoff for Inkludering i Vest 3. november 2025 i opptak 

– Vår største formue er folka våre, og arbeidskrafta vår. Vi har grunn til å vere litt bekymra, for vi står foran nokre store utfordringar. Vi manglar folk og arbeidskraft i mange sektorar. Vi blir færre i yrkesaktiv alder, og fleire eldre. Det er eit paradoks at når vi skrik etter arbeidskraft, står 630 000 utanfor utdanning, aktivitet eller jobb. 100 000 av dei er unge under 30 år. Mange av dei både kan og vil jobbe. Det er vår felles jobb å ta dei ressursane i bruk, og det er nettopp det de gjer her, å samle kreftene som kjem til å gi resultat, sa arbeids- og inkluderingsminister Kjersti Stenseng i sin opningstale.

Skal jobbe meir kunnskapsbasert 

Prosjektet blir drive i tett samarbeid mellom Vestland fylkeskommune, Nav, NHO, LO og KS, og vil også knytast til regjeringa sitt samfunnsoppdrag Ingen barn og unge utanfor. 

Hovudmålet er å identifisere og løfte fram lovande praksisar frå heile fylket. Forskingsinstituttet NORCE skal dokumentere og evaluere tiltak, slik at dei beste praksisane kan bli del av varig drift og bli tekne i bruk i større delar av fylket. 

– Vi veit mykje om kva som verkar, og vår forventning til prosjektet er at det skal bidra til at vi jobbar meir kunnskapsbasert i heile Vestland. Spesielt innanfor området flyktningar og innvandrarar ser vi at kommunane jobbar svært ulikt – her ligg det mykje skjult kompetanse som vi må få fram. Det gjer det også blant unge, og arbeidslivet i Vestland har ikkje råd til å miste ein einaste ungdom, seier Bjarte Hysing Olsen, fylkesdirektør i NAV Vestland.

Til foto frå kick-off i Vestlandshuset 3. november

Viktig satsing for næringslivet i Vestland

– Over 60 prosent av verksemdene i Vestland slit med å få tak i nok tilsette med rett kompetanse. For næringslivet er det avgjerande at vi klarar å inkludere fleire i arbeidslivet. Det at vi no har ei oversikt over tiltak som verkar, og styrkjer desse, gjer at næringsliv og kommunar saman kan ta grep for å redusere utanforskap. Dette vil gi fleire enkeltpersonar ein sjanse i arbeidslivet, i tillegg til å styrkje næringslivet i regionen, seier Helene Frihammer, regiondirektør i NHO Vestland.