Utlysing av forskingsmidlar for ei meir berekraftig havbruksnæring
Vestland fylkeskommune har løyvd fem millionar kroner til forsking, kunnskapsdeling og samarbeid for å styrke arbeidet mot lakselus og betre vilkåra for villaks og sjøaure. Midlane er no lyste ut.
Bruken av midlane skal ha som målsetjing at Vestland kjem i grøn sone i trafikklyssystemet, og skal gjennomførast i samarbeid med forskingsmiljø og næringa.
Løyvinga vart vedteke i hovudutval for næring 23. april i år og er no lyst ut. Midlane er delt i to tema, med kvart sitt budsjett:
Frå raudt til grønt - FoU-prosjekt som kan styrke næringa sitt arbeid å redusere talet på lakselus i oppdrettsanlegg
Inntil 2,8 millionar kroner vert lyst ut som støtte til FoU-prosjekt som kan styrke næringa sitt arbeid med å redusere talet på lakselus i oppdrettsanlegg. Utlysinga opnar også for prosjekt som evaluerer pågåande arbeid med nye tekniske løysingar og førebyggjande tiltak mot lakselus.
Her kan du lese meir om utlysinga og søke midlar.
Frå raudt til grønt - auka kunnskap for å avdekke ulike årsaker til nedgang/variasjon i lakse- og sjøaurebestanden
Inntil 2 millionar kroner vert lyst ut til FoU-prosjekt som kan avdekke ulike årsaker til nedgang/variasjon i lakse- og sjøaurebestandane. Som del av denne delen av utlysinga er det aktuelt å støtte forsterking og vidare utvikling av nokre pågåande kunnskapsprosessar.
Her kan du lese meir om utlysinga og søke midlar.
Søknadsfrist for begge utlysingar er 1. september 2025.
