Fordelte 15 millionar til nyskaping i kulturlivet

– Her dobla vi potten frå staten, og responsen har vore enorm. Det er gledeleg at vi no kan støtte 37 gode prosjekt, som eg er sikker på at kjem kunst- og kulturaktørar, publikum og Vestland som det leiande kulturfylket, til gode. Men vi skulle sjølvsagt gjerne ha støtta mange fleire, seier Jacob Nødseth, leiar for hovudutval for kultur, idrett og inkludering i Vestland fylkeskommune. 

Regional kulturfond er ei ny, nasjonal ordning, og Vestland fylkeskommune fekk over 7,4 millionar frå staten til årets tildeling. Fylkeskommunen la på nærare 7,6 millionar og lyste ut 15 millionar. Det kom inn til saman 199 søknadar om over 118 millionar kroner gjennom ordninga. 

Tre prosjekt får 1 million eller meir 

Hovudutval for kultur, idrett og inkludering fordelte midlane i møtet 19. november. Den største tildelinga er på 1,5 mill. kr går til prosjektet BAKOM BUZZ, i regi av BAKOM, ei avdeling av Vestnorsk filmsenter AS. Tildelinga skal fordelast over tre år. Prosjektet gir ungdom i heile Vestland gratis tilgang til kurs og verkstadar i film- og spelutvikling gjennom ein rullande utstyrssentral.  

Dei to andre prosjekta som får over 1 million i støtte er prosjekta «Kode Kunstsatelitten», i regi av Kode kunstmuseer og komponisthjem, og «Stad i 4000 år», i regi av Stad kommune. Begge desse tildelingane går også over tre år. 

Kultur byggjer samfunn 

Dei andre tildelingane frå regionalt kulturfond spenner mellom 100 000 kr og 800 000 kr, og det varierer om støtta blir gitt over eitt, to eller tre år. Det regionale kulturfondet skal blant anna stimulere til auka aktivitet og deltaking i kulturlivet, styrke samspelet mellom profesjonelt og frivillig kulturliv og styrke lokal og regional kulturfrivilligheit.  

– Kultur byggjer samfunn. Det er visjonen i den regionale kulturplanen vår. Då må vi løfte både dei profesjonelle og dei frivillige. Vi må sjå samanhengar, og vi må byggje kulturfylket Vestland saman. Det skal regionalt kulturfond bidra til, ved å støtte utviklingsprosjekt som bidreg til visjonen vår, seier hovudutvalsleiar Nødseth. 

Jobbar vidare med ordninga 

Regionalt kulturfond har fått stor merksemd i kulturlivet i Vestland, som har hatt høge forventingar til ordninga. Både den nasjonale forskrifta og retningslinjene for Vestland er vide og femnar breitt, noko som har resultert i mange og varierte søknadar. 

– Det er godt å sjå at vi har eit offensivt kunst- og kulturliv, som vil få til noko og som vil skape. No må vi sjå på retningslinjer og innretning for neste års utlysing, slik at vi treff og får mest mogleg kultur for pengane. Det blir del av det heilskaplege arbeidet med å leggje om tilskotsordningane. Samstundes blir det spennande å sjå korleis budsjettforhandlingane i Stortinget går, der regjeringa har foreslått ein reduksjon i regionale kulturfond. Vi har eit tverrpolitisk ønskje i Vestland om å halde på denne ordninga, seier Nødseth.  

Desse får støtte 

Du finn ei fullstendig oversikt over kva prosjekt som får støtte i saksframlegget til PS 128/2025 Regionalt kulturfond Vestland – tildeling 2025. Hovudutvalet vedtok forslaget slik det står i tabellen.