Ein halv million til kvart av destinasjonsselskapa i Vestland
Hovudutval for næring deler til saman ut 3,5 millionar til sju destinasjonsselskap i Vestland Midlane skal nyttast til arbeid for berekraftig reiselivsutvikling og besøksforvaltning i 2026.
– Reiselivsnæringa er viktig for både verdiskaping, utvikling av lokalsamfunna våre og arbeidsplassar. Ved å støtte reiselivet gjennom midlar til destinasjonsselskapa ønskjer Vestland fylkeskommune å sikre at arbeidet med omstilling og utvikling til eit meir berekraftig reiseliv held fram, seier Sigrid Brattabø Handegard, leiar for hovudutval for næring.
Midlane skal nyttast til arbeid for berekraftig reiselivsutvikling og besøksforvaltning . Destinasjonsselskapa skal også delta aktivt gjennom Reiselivsforum Vestland, der fylkeskommunen samlar Innovasjon Norge Vestland, Fjord Norge AS, Statsforvaltaren i Vestland og destinasjonsselskapa.
Vedtaket vart gjort i hovudutval for næring sitt møte i Sogndal 17. september.
Desse destinasjonsselskapa mottek midlar:
- Visit Bergen 500 000 kr
- Visit Sunnhordland 500 000 kr
- Visit Hardangerfjord 500 000 kr
- Visit Voss 500 000 kr
- Visit Sognefjord 500 000 kr
- Visit Nordfjord 500 000 kr
- Visit Fjordkysten og Sunnfjord 500 000 kr
Midlane til destinasjonsselskapa vert dekka over budsjett 2025, med 2,8 millionar kroner avsett til reiseliv og 0,7 millionar kroner avsett frå posten distrikts- og lokalsamfunnsutvikling.
Til sak 70/2025 Midlar til destinasjonsselskapa for 2026
Skal djupdykke i reiselivsarbeid
Hovudutval for næring vedtok også i sak PS 72/2025 Reiselivsarbeidet på Vestlandet at Vestland, saman med dei to andre Vestlandsfylka, utarbeider eit kunnskapsgrunnlag for det framtidige reiselivsarbeidet på Vestlandet. Kunnskapsgrunnlaget skal nyttast til å vurdere fylkeskommunane sin framtidige innsats innan reiseliv.
Det vert stilt til rådvelde inntil kr 340 000 til dette arbeidet, dekka med midlar på budsjett 2025, post distrikts- og lokalsamfunnsutvikling.