Desse vil bli ny fylkesdirektør
Sju kvinner og fem menn har søkt om å bli ny fylkesdirektør i Vestland fylkeskommune.
Fylkesdirektør Rune Haugsdal varsla i juni i år at han gir seg i stillinga 31. desember, eller når ny fylkesdirektør er på plass. Stillinga har vore lyst ut, og fristen gjekk ut søndag 12. oktober.
Godt nøgde med søkjarlista
- Nadine Muba Mbungu, 40, student
- Alexander Refsnes Andrassy, 48, senioringeniør
- Sara Mathisen, 31, avdelingsleiar
- Beth Madelen Granholdt, 29, leiartalent
- Aud Marie Åsen, 55, direktør
- Merethe Mæland, 49, avdelingsdirektør – stab for virksomhetsstyring
- Sven Erik Midthjell, 42, politistasjonssjef
Fem søkjarar er unnateke offentlegheit, tre menn og to kvinner.
– Prosessen går som planlagt. Vi er godt nøgde med søkarlista, som inneheld veldig kvalifiserte kandidatar. Vi styrer mot å ha ei innstilling klar medio november, men prosessen må ta den tiden han tar, seier fylkesordførar Jon Askeland.
Fylkestinget tilset
Det er fylkestinget som tilset fylkesdirektøren. Fylkesutvalet oppretta 24. juni i eit arbeidsutval for tilsetjinga, som står for det praktiske i samband med tilsetjinga.
Desse sit i tilsetjingsutvalet:
Fylkesordførar Jon Askeland (Sp), fylkesvaraordførar Stian Davies (Ap), Trude Brosvik (KrF), Silja Ekeland Bjørkly (H) og Terje Søviknes (FrP).