8,4 millionar til 17 prosjekt for berekraftig samfunnsutvikling

Tilskotsordning for berekraftig samfunnsutvikling er ei årleg tildeling som skal bli brukt til by- og stadutvikling, sosial utjamning av helseskilnadar, og til å mobilisere til klimaomstilling og nullutslepp.
Målet med ordninga er å skape tilgjengelege, inkluderande og trygge stadar der folk trivst, kjenner tilhøyrsle og stimulerer til aktive liv.
Ordninga omfattar dei tre innsatsområda by- og stadutvikling, klima og miljø, og sosial utjamning. Kommunane kan søkje på eitt, fleire eller på tvers av innsatsområda. Ordninga skal særleg stimulere til utvikling av nye samarbeid og måtar å jobbe på for å nå berekraftsmål, og å gje gode eksempel som andre kan verte inspirert av.

Samarbeid og samskaping

I år kom det inn 26 søknadar frå 14 kommunar. Innkomne søknader syner ei geografisk fordeling utover heile fylket. Dei 17 søknadane som har fått støtte er vurderte til å svare godt, til svært godt på tildelingskriteria i utlysinga. 
 
– Det blir gitt tilskot til mange ulike arbeid i fylket, som syner stor variasjon. Ein fellesnemnar for arbeida er samarbeid og samskaping for å sikre ei berekraftig samfunnsutvikling i kommunen, byen eller tettstaden. Kommunane får midlar til å skape gode og inkluderande møteplassar lokalt. Her er prosjekt som fokuserer på sirkulære løysingar, og å ta i bruk eksisterande område, bygningar og material til noko nytt for innbyggjarane, seier fylkesordførar Jon Askeland.

 – Bidreg til å nå måla våre

To tiltak har fått mest, og ein million kroner kvar i støtte: Bergen kommune med «Vegkart for sirkulær byggenæring» og Voss kommune med prosjekt «Generatoren – aktivitetshus i Voss herad». Bergen kommune har og fått nær ein million kroner til ein «Gåbypilot». Her er det gitt tilskot til delar av pilotarbeidet i søknaden som særskild gjeld universell utforming som i tråd med fylkeskommunen sin innsats på området.
 
– Det er mange gode og spennande tiltak som har fått støtte, blant anna Sveio kommune som ønsker å utvikle Tinghuset som sosial møteplass, og Gulen kommune sitt prosjekt «miljø- og klimavennlege innbyggarar». Søknadene som no har fått støtte bidreg til å nå måla våre for berekraftig samfunnsutvikling, seier Askeland om tildelingane.

Tilskot som pådrivar til endring i kommunane

Vestland fylkeskommune skal styrke rolla fylkeskommunen har som samfunnsutviklar, og samordne aktiviteten ovanfor kommunar og eksterne aktørar. Eit sentralt verkemiddel fylkeskommunen kan nytte er tilskot. Gjennom bruk av tilskotsordningar kan fylkeskommunen støtte innhenting av ny kunnskap, prosessar, utviklingsarbeid og prosjekt i kommunane. 
Utviklingsplan for Vestland 2020–2024 set retning for utviklinga i fylket og har visjon om å skape eit berekraftig og nyskapande Vestland, og  å styrke lokalsamfunn, kvardagsliv og like moglegheiter for alle, samt sette klima og miljø som premiss for samfunnsutviklinga. 
 
Fylkesutvalet vedtok i møte 19. september at følgjande tiltak mottek støtte:

Kommune	Tilskot	Prosjekt
Bømlo	80.000	Kystrom – arkitektonisk og estetisk rettleiar
Bergen	797.000	Utvikling av nye berekraftstilbod ved biblioteket
Bergen	1.000.000	Vegkart for sirkulær byggenæring
Bergen	750.000	Naturens rolle i      klimavennleg arealplanlegging
Voss	1.000.000	Generatoren – aktivitetshus i Voss herad
Austrheim	600.000	Strandpromenade og pir i Nedre Fonnesvågen
Sveio	250.400	Tinghuset som sosial møteplass i Førde sentrum
Sunnfjord	500.000	Elvehagen
Sunnfjord	330.000	Saman om sentrumsutvikling – tilrettelagt medverknad
Etne	225.000	Områdeplan for Skånevik sentrum
Voss	500.000	Moglegheitsstudie Voss sentrum
Gloppen	100.000	Plant og leik i Sandane sentrum
Solund	400.000	Kulturvandringsløype
Stad	245.000	Midt i gata – mellombels møteplass i Nordfjordeid sentrum
Gulen	430.000	Miljø- og klimavennlege innbyggarar
Bømlo	213.000	Velkomstpakkar til tilflyttarar
Bergen	979.600	Gjennomføring av Gåbypilot