Gi innspel om breiband og digitalisering i Vestland

Det vedtok fylkesutvalet denne veka. Kommunar, næringsliv og andre interesserte blir oppmoda til å komme med sine innspel innan fristen 14. april.

– Vestland skal ha ein digital infrastruktur som sikrar mobilitet og digitale tenester. Vi skal saman utvikle eit meir inkluderande og aldersvenleg samfunn, og vil legge til rette for trygg oppvekst, utdanning og livslang læring, seier fylkesordførar Jon Askeland.

Skal samordne arbeidet med digital infrastruktur

Den digitale teknologien endrar samfunnet radikalt, og digitaliseringa er gjennomgripande i kvardagsliv, utdanning og yrkesliv. Formålet med temaplanen er å sikre at arbeidet knytt til digital infrastruktur og digitalisering blir samordna, legge føringar for verkemiddel som blir forvalta i fylket, og peike på moglegheiter og utfordringar når det gjeld digitalisering.

– Vestland fylkeskommune skal ha ei aktiv rolle i møte med digitaliseringa av samfunnet. Mykje av infrastrukturen er på plass. No skal det utviklast samfunn, verksemder og tenester som tek i bruk den digitale infrastrukturen. Då trengs det meir kunnskap og innovasjon, seier Askeland.

Temaplan for breiband og digitalisering gjeld for perioden 2023 til 2029. Vestland fylkeskommune har forvaltningsansvaret for offentleg støtte til breibandsutbygging løyvd over statsbudsjettet, og har eit overordna koordineringsansvar for regional kompetansepolitikk i fylket.

Kva er ein temaplan?

Fylkeskommunen utarbeider temaplanar på fagfelt der fylkeskommunen som tenesteprodusent eller samfunnsutviklar har stor påverknad ut mot samfunnet. Temaplanane skal bidra til samordna innsats, og legge føringar for bruk og prioriteringar av verkemiddel på eit overordna strategisk nivå.