Førstelinjetenesta for gründerar

Førstelinjetenesta er inngangsporten til resten av det offentlege verkemiddelapparatet, som bidrar til at fleire nye bedrifter utviklar seg og overlev. Det er ei kommunal oppgåve å ha eit næringsapparat som skal fungere som første kontaktpunkt for gründerar for å hjelpe dei i gang med oppstart av bedrift, men det er ikkje lovpålagt. 

Hovudfunn frå rapporten

Samtalar med kommunane har vist at det fins mange ulike måtar å løyse denne oppgåva på, og det er fordelar og utfordringar knytt til kvar av dei. 

Styrkar i dagens førstelinjeteneste: 

Det er ein fordel om kommunen prioriterer næringsutvikling og førstelinjeteneste høgt, og sørger for god flyt og informasjon. I tillegg er det ein fordel om kommunen og næringslivet har kontaktpunkt gjennom t.d. næringsforening.

Utfordringar som går igjen: 

Fleire kommunar peikar på ressursmangel som ei sentral utfordring. Det er ofte få personar som skal dekke eit breitt spekter av oppgåver, og organiseringa er sårbar for endringar. I mindre kommunar er det lågt volum av førespurnadar, noko som gjer det krevjande å oppretthalde kompetanse og tilbod. Plattformen En vei inn er lite brukt, og fleire fryktar at den kan skape tersklar heller enn å senke dei.

Behov og ønske frå førstelinjetenesta:

• Det manglar nasjonale føringar og definisjonar for kva førstelinjetenesta skal innehalde, og mange etterspør ei betre forståing av kva som er forventa.
• Sidan mange er aleine i rolla som førstelinjeteneste, er det eit klart behov for eit fagleg og kollegialt nettverk. 
• Fleire av kommunane etterspør hjelp til å tilby gründerrettleiing til innvandrarar og spesielt flyktningar. 
• Mange ytra ønske om at fylkeskommunen skal vere ein koplingsboks, eit kontaktpunkt som kan  halde oversikt og setje saman relevante samarbeid og prosjekt.
• I fleire intervju kom det fram ønskje om ein styrka kultur for næringsutvikling og gründerverksemd.

Konklusjon

Rapporten har identifisert at det er behov for betre rolleforståing og kompetanse i førstelinjetenesta, eit nettverk og kollegialt fellesskap, koplingar og samarbeid, og å fremje gründerkultur. Basert på desse behova legg rapporten fram tre tilrådingar som kan bidra til å styrke førstelinjetenesta: 

1. fylkeskommunen som koplar og kulturbyggar
2. nettverk for førstelinjetenesta
3. kompetansesenter for førstelinjetenesta

Rapporten blei skrive som del av arbeidet med planen Berekraftig verdiskaping: Regional plan for innovasjon og næringsutvikling 2021-2033 og tilhøyrande handlingsprogram og årsplanar.