Mange vil vere med i konkurransen om Heilevang
Vestland fylkeskommune har invitert entreprenørbransjen til konkurranse med forhandlingar om rassikring av fylkesveg 609 mellom Heilevang og Hestvika. Sju entreprenørfirma og arbeidsfellesskap har søkt om å få vere med.
Desse er:
- Bertelsen & Garpestad AS og Metrostav Norge AS
- Hæhre Entreprenør AS
- Implenia Norge AS og Stangeland Maskin AS
- Leonhard Nilsen & Sønner AS og Entreprenørservice AS
- NCC Norge AS
- Obrascon Huarte Lain, S.A. og Aurstad Tunnel AS
- Veidekke Entreprenør AS
Godt nøgd prosjektleiar
Innan slutten av juni vil Vestland fylkeskommune ha bestemt seg for kor mange entreprenørar som blir invitert til å gje tilbod og delta i vidare forhandlingar.
Frist for levering av første tilbod er 7. oktober.
– Vi er veldig godt nøgde med deltakinga i konkurransen, her er det mange solide aktørar som skal vere i god stand til å utføre oppdraget. No gler vi oss til å gå i gang med forhandlingane, og ta nokre steg vidare mot dette viktige rassikringsprosjektet, seier Jon Harald Huseklepp, prosjektleiar i Vestland fylkeskommune.
Siste og endelege tilbod skal inn i slutten av november. Prosjektet tek sikte på signering av kontrakt i januar 2026, og at arbeidet kjem i gang i løpet av våren.
