Evaluering viser gode resultat frå FORREGION

Førebelse resultat frå ei evaluering gjennomført av Oxford Research hausten 2026 viser at Forskingsbasert innovasjon i regionane (FORREGION) når bedrifter i heile landet og har ein tydeleg distriktsprofil. Medan nasjonale forskingsverkemiddel i større grad er konsentrerte om dei mest sentrale områda, bidreg FORREGION til å gjere forsking og innovasjon tilgjengeleg også for bedrifter i distrikta.

Evalueringa av FORREGION viser at ordninga spelar ei viktig rolle i å mobilisere bedrifter til forskings- og utviklingsarbeid. Gjennom kompetansemekling og støtte til forprosjekt får bedrifter hjelp til å avklare kunnskapsbehov, utvikle prosjektidéar og etablere samarbeid med relevante forskingsmiljø. Ordninga fungerer slik som eit viktig første steg inn i forskings- og innovasjonssystemet.
 

Fleire bedrifter tek steget vidare

I perioden 2017–2025 fekk 1 284 bedrifter støtte til FORREGION-forprosjekt. Evalueringa viser at om lag 45 prosent av desse seinare gjekk vidare med forskingsprosjekt. Resultata viser at FORREGION bidreg til å mobilisere fleire bedrifter til forsking og innovasjon.
 

Når bedrifter i heile landet

Eit anna sentralt funn er den tydelege distriktsprofilen til FORREGION. Om lag 22 prosent av forprosjekta er gjennomførte i dei minst sentrale kommunane i landet. Til samanlikning går berre 8 prosent av innovasjonsprosjekta i Noregs forskingsråd til bedrifter i dei same områda. Dette viser at FORREGION når bedrifter som i mindre grad nyttar dei nasjonale forskingsverkemidla.

Viktig inngang til forsking

Samla konkluderer evalueringa med at FORREGION bidreg til at fleire bedrifter klatrar i forskingstrappa. Gjennom kompetansemekling og forprosjekt får bedrifter erfaring med forskingssamarbeid, auka forståing for korleis forsking kan nyttast i utviklingsarbeidet og betre føresetnader for å gå vidare til nye FoU- og innovasjonsprosjekt. Samstundes viser rapporten at mange bedrifter treng vidare støtte for å ta steget frå mindre forprosjekt til større forskings- og innovasjonsprosjekt. 

Endeleg lansering av evalueringsrapporten er 11. november 2026 kl. 10.00. Det kan førekome mindre endringar fram til lanseringa.