Universell utforming
Universell utforming er viktig for å sikre at omgjevnadene er tilgjengelege for alle, uavhengig av funksjonsevne. Det skal bidra til å skape funksjonelle og inkluderande fysiske omgjevnader med høg kvalitet, som er trygge og attraktive for ulike grupper.
Utviklingsplan for Vestland 2024–2028 har universell utforming som eitt av åtte gjennomgåande plantema. Dette er tema som skal prioriterast høgt i all planlegging, og som er særleg relevante for alle sektorar og plannivå for at vi skal nå måla våre. Eitt av hovudmåla i utviklingsplanen er «Vestland er eit inkluderande fylke med trygge, attraktive og livskraftige lokalsamfunn i heile fylket». Les meir om hovudmålet om demografi og likeverd her.
Universell utforming som fylkeskommunal oppgåve
Fylkeskommunen har ansvar for tenester som er viktige for innbyggarane. Universell utforming er relevant for alle tenestene og ansvarsområda våre, og det er ei oppgåve vi må løyse i fellesskap. For fylkeskommunen er det særleg viktig å sikre likeverdig tilgjengelegheit til kollektivtransport, vidaregåande utdanning, kultur og kulturminne, friluftsliv, tannklinikkar og fylkesvegar.
Rådet for menneske med nedsett funksjonsevne skal fremje interessene til denne gruppa i dei fylkeskommunale tenestene og ansvarsområda. Rådet har ei rådgjevande rolle og har rett til å uttale seg i saker om personar med funksjonsnedsetjingar.