Vossa Jazz-prisen til Toivo Fjose

– Fjose framstår som ein musikar med sterk kunstnerisk vilje og stor fleksibilitet. Det gjeld både i eigne band, der han syner seg som både komponist og bandleiar, til meir kollektivt orienterte konstellasjonar og sjangeroverskridande samarbeid, seier fylkesordførar Jon Askeland, som delte ut prisen under Vossa Jazz laurdag 28. april.

Stjernehimmel av musikarar

Prisen er på 50 000 kr og eit trykk av årets Vossa Jazz-plakat, som er laga av festivalkunstnar Ingunn van Etten.

– Det er ein fin tradisjon at vi før tingingsverket løftar fram ein jazzmusikar på denne måten. Vossa Jazz-prisen har blitt ein del av kjenneteiknet på festivalen, som tek rekrutteringsansvaret sitt på alvor. Gjennom snart 40 år har vi sett ein stjernehimmel av musikarar blitt løfta fram på denne måten, seier Askeland.

Grunngjevinga til juryen

Årets prismottakar er ein musikar som over tid har markert seg som ei tydeleg og ettertrakta røyst i jazz- og musikkmiljøet både på Vestlandet og nasjonalt. Gjennom ein brei portefølje av prosjekt viser årets prisvinnar ei imponerande spennvidd. Frå eigne band der hen syner seg som både komponist og bandleiar, til meir kollektivt orienterte konstellasjonar og sjangeroverskridande samarbeid, framstår hen som ein musikar med sterk kunstnerisk vilje og stor fleksibilitet.

Vinnaren er utdanna ved jazzlinja på Griegakademiet og har både under og etter studietida vore ein aktiv bidragsytar til det lokale musikkmiljøet i byen, og i regionen. Årets prismottakar reiste tidleg i karrieren verda rundt med ei av dei største popstjernene i landet, og er stadig vekk på turné internasjonalt med musikk som har eit ganske kjølig uttrykk.

Under eige namn har musikaren mellom anna gitt ut to album med eigen kvintett, og har medverka til ei lang rekke utgivingar og prosjekt i ulike sjangrar. Snart er hen plateaktuell med ein Vossa Jazz-aktuell kvartett, og har i tillegg ei ny utgjeving med Vestnorsk Jazzensemble på veg.

Vinnaren har dei siste åra utvida det kunstnarlege virket sitt til teatermusikk, og samarbeidd med anerkjende institusjonar som Den Nationale Scene, Teater Vestland, Teatret Vårt og Det Vestnorske Teateret. Hen har òg jobba mykje i det frie scenefeltet og spelt tallause framsyningar for barn over heile landet. Nyleg leverte hen òg bestillingsverk og konsertførestilling for barn under Bajazz-festivalen i Bergen.

Vinnaren har røtene sine på Voss, og på Vossa Jazz i år har han vore på scena med The Red Barn fredag,  og sundag var det urpremiere på den nye trioen hans, Captcha, i Osasalen.