Vestland satsar på idrett: 14,2 millionar til arrangement og arenaer
Den største enkeltløyvinga er 12,5 mill. kr og går til Slåtthaug Arena i Bergen, men også 23 nasjonale og internasjonale idrettsarrangement får støtte.
– Slåtthaug Arena er eit framtidsretta anlegg som vil romme mange idrettar og gi heile regionen eit løft. Det blir ein viktig møteplass for idretten i Bergen og Vestland i mange år framover. Dette er ei investering vi er stolte av å bidra til, seier Jacob Nødseth, leiar for hovudutval for kultur, idrett og inkludering.
Hovudutvalet fordelte tilskota til nasjonale og internasjonale idrettsarrangement og -arenaer i møtet 18. juni.
Det første inkluderande parasenteret
Det er Fana idrettslag som står bak Slåtthaug Arena. Her vil Bergen og omegn få eit nytt innandørs is-areal på 8000 kvadratmeter. Anlegget skal blant anna også ha motorikkhall, fleire danseareal, koordinasjonssalar for fleire idrettar, klatreområde, styrkerom, spinningsal og løpebaner, arrangementsrom og skadeførebyggande avdeling. Her skal det kunne arrangerast store nasjonale og internasjonale konkurransar innan is-idrettar.
– Slåtthaug blir også det første inkluderande parasenteret i Noreg, med reel likestilling mellom funksjonsfriske og menneske med nedsett funksjonsevne. Det er viktig særleg med tanke på endringane i menneskerettslova som kom ved nyttår i år, seier Nødseth.
Lova skal motverke diskriminering på grunn av nedsett funksjonsevne. Ho skal sikre respekt for sivile, politiske, økonomiske, sosiale og kulturelle rettar til menneske med nedsett funksjonsevne.
23 arrangement over heile fylket
Den andre arenaløyvinga går til Voss ski og tursenter, som får 500 000 kr til utviding av snøproduksjonsanlegg, slik at dei får stabile snøforhold til å kunne arrangere nasjonale arrangement. I tillegg får 23 nasjonale og internasjonale idrettsarrangement rundt om i Vestland tilskot. Mange og varierte arrangement får støtte, frå stuping og karate til segling, friidrett og handball.
Sjå oversikt over alle arrangementa som får støtte i saksframlegget. Hovudutvalet vedtok tilskota slik dei står i tabellen.
– Vestland er ein region som meiner alvor når vi seier at vi vil vere eit leiande arrangementsvertskap. Det er bra for idretten, for frivillige og for lokalsamfunna. Viljen til å vere vertskap får positive ringverknadar for frivilligheita og lokalt næringsliv. Det er også bra for både anleggsutvikling og kan inspirere unge utøvarar, seier Nødseth.
Arrangementskompetanse for framtida
Vestland fylkeskommune deltek òg i møteplassen “Arrangementskompetanse” i Idrettsklynge Vest. Dette er eit samarbeid med Vestland idrettskrets, SK Brann, Visit Bergen og Bergen kommune. Visjonen til idrettsklynga er «styrke i samspel», og målet for møteplassen er å vidareutvikle Bergen og Vestland som arrangementsvertskap.
– Når vi går saman om å utvikle arrangementskompetansen i regionen, er vi i stand til å hente fleire store arrangement til Vestland. Det er «styrke i samspel» i praksis, slår Nødseth fast.
«Møteplassen Arrangementskompetanse» i Idrettsklynge Vest jobbar særleg med kompetanseutvikling for arrangørar, arrangørnettverk i Vestland, verktøykasse for arrangørar og anlegg- og arenautvikling. Det er også eit mål å påverke nasjonalt utviklingsarbeid innan fagfeltet.