Fyksesund bru får 50 nye leveår
Målretta opprusting skal sikre trygg ferdsel over den viktige hengebrua i mange år framover, til ein tidel av kostnadane ved nybygg. – Eit berekraftig val for framtida og regionen, seier fylkesordføraren.
Fylkesutvalet i Vestland vedtok opprusting av Fyksesund bru på fv. 79 i møtet 28. april 2026.
Trygg og robust bru i fleire tiår
Hengebrua i Kvam herad mellom Øystese og Ålvik har i dag ei restlevetid på 11 år av den normerte levetida på 100 år. Brua er viktig både regionalt og strategisk, også som omkøyringsveg for E16 ved vegstengingar. Fylkesutvalet vedtok rehabilitering av brua kostnadsrekna til om lag 125 millionar kroner over fem år. Dette tilsvarar rundt ein tidel av kostnadane ved å planleggje og bygge ei ny bru.
– Med vedlikehald får vi meir veg for pengane, vi sikrar trygg ferdsel for folk og næringsliv og mindre klimaavtrykk utan å bruke milliardbeløp, seier Jon Askeland, fylkesordførar i Vestland.
Teknisk forprosjekt peikar klart på vedlikehald
Eit eige forprosjekt og tekniske undersøkingar viser at brua er i relativt god stand, og konklusjonen er at levetida godt kan forlengast med nødvendige vedlikehaldstiltak. Det mest kritiske konstruksjonselementet er dei innstøypte forankringsstaga for berekablane. I 2025 vart det gjennomført inngåande kontroll av kabelforankringspunkt, som viste god tilstand utan teikn til korrosjon.
Eit berekraftig vegval
Å byggje ny bru ville ført til utslepp frå produksjon av stål, betong og asfalt, i tillegg til omfattande anleggsarbeid og nye arealinngrep. Ny plassering krev omfattande planlegging. Ved å ta vare på eksisterande infrastruktur reduserer fylkeskommunen både klima‑ og miljøavtrykket vesentleg, og hovudføringa i Regional transportplan for Vestland 2022–2033 seier at vi skal vedlikehalde framfor å bygge nytt. No set planlegging av opprustingstiltaka i gang.
– Dette er eit godt døme på korleis vi kan ta vare på viktig infrastruktur med kunnskapsbaserte val, seier fylkesordførar Jon Askeland.