Vi samlar kulturarven digitalt og inviterer til webinar
Vestland fylkeskommune har gjort det endå enklare å utforske den rike kulturarven vår. Du finn no foto, musikk, lydopptak, film og historiske brev på ei felles plattform, det digitale fylkesarkivet.
På det digitale fylkesarkivet kan du blant anna
- høyre opptak av folkemusikk frå heile regionen
- lytte til livsminneintervju og innlesne amerikabrev, som gir unike innblikk i kvardagsliv, migrasjon og lokalhistorie
- sjå historiske filmopptak som dokumenterer samfunn, arbeidsliv og kulturhistorie i Vestland gjennom fleire tiår
- lese historiske brev frå utvandra nordmenn til Amerika, som fortel personlege historier og samstundes er viktige kjelder til samtida si
- utforske fotoarkivet vårt med motiv frå bygder, byar, hendingar, landskap og kulturmiljø i heile fylket
- bidra i vernearbeidet gjennom å til dømes transkribere brev eller registrere opplysingar til historiske foto
Gå til det nye, digitale fylkesarkivet.
Alle skal kunne ta del i kulturarven
Målet er å gjera materialet lett tilgjengeleg for fleire, samstundes som dei som allereie nyttar arkiva våre, skal få ei meir brukarvennleg og heilskapleg oppleving. Ei slik samla løysing styrkjer òg arbeidet med å bevare og formidle kulturarven for framtida.
– Vi er glade for å kunne tilby publikum ein felles søkeinngang til dette materialet. Det gjer det enklare for alle å oppleve, utforske og ta vare på den felles kulturarven vår, seier Arnt Ola Fidjestøl, seksjonsleiar for arkiv.
Invitasjon til webinar
For å gjere det endå enklare å ta i bruk den nye løysinga, inviterer vi til webinar 1. desember kl. 12.30.
Her får du ei praktisk og nyttig innføring i
- korleis du brukar det digitale fylkesarkivet
- vilkår for bruk og rettar
- bestilling, tilgang og gjennomsyn av samlingane
