Vestland held stand i vidaregåande opplæring
Årsresultat og analyse av skuleåret 2024/25 syner at Vestland fylkeskommune ligg over landssnittet i gjennomføring i vidaregåande opplæring. Samtidig peikar analysane på særlege utfordringar knytt til fråvær og fråfall blant Vg1-elevar.
– At Vestland ligg over landssnittet, og at vi lukkast betre med elevar som har svake grunnskuleresultat, er svært gledeleg. Det seier noko om kvaliteten i skulane våre og den store innsatsen til både lærarar og elevar, seier fylkesordførar Jon Askeland.
Årsresultatet og analysen for skuleåret 2024/25 vart vedtekne av fylkestinget 10. desember 2025, og skal liggje til grunn for vidare arbeid og prioriteringar i vidaregåande opplæring.
Over landssnittet og betre resultat for sårbare elevar
Det overordna målet for vidaregåande opplæring i Vestland er å fornye og forbetre slik at fleire fullfører. Tala for 2024/25 viser fleire positive trekk:
- 84,1 prosent av elevane fullførte og bestod, dette er over landssnittet på 82,4 prosent.
- Elevane med lågast grunnskulepoeng fullfører oftare enn før. For 2018-kullet har 43 prosent fullført innan 5–6 år, opp frå 28 prosent for 2007-kullet.
- Yrkesfag og studieførebuande er no omtrent jamstilte i fullføring: 84,4 prosent på yrkesfag og 84,6 prosent på studieførebuande.
- Karaktersnittet ved årsslutt ligg stabilt på 4,21. Yrkesfaga har hatt jamn auke sidan 2018/19 og ligg no på 4,19.
Når vi tek med elevane som brukar fleire år på opplæringa og framleis er i løp, stig den reelle fullføringsprosenten til 86,1 prosent.
Vg1 er mest sårbar
Sjølv om tala er gode, er det framleis for mange som sluttar, særleg på Vg1. Analysane viser at:
- Flest elevar sluttar i løpet av det første året i vidaregåande. Spesielt gjeld dette elevar som ikkje kjem inn på førstevalet sitt for utdanningsprogram.
- Elevar som har omval eller repeterer Vg1, har klart lågare fullføring enn andre – berre 53,8 prosent fullførte i 2024/25.
– Overgangen frå ungdomsskule til vidaregåande er ein kritisk fase. Når vi ser at det er her flest sluttar, veit vi òg kvar vi må setje inn innsatsen. Desse ungdomane kan vi ikkje miste. Vi må sørgje for at dei opplever tilhøyrsle, meistring og relevans i opplæringa, og at dei får den oppfølginga dei treng, seier Askeland.
For å møte dette arbeider fylkeskommunen målretta med overgangen frå ungdomsskule til vidaregåande. Gjennom dialog med kommunane og bruk av digitale analyseverktøy identifiserer skulane sårbare elevar tidlegare, blant anna allereie ved inntak.
Fråvær: Ei lita gruppe dreg snittet opp
Gjennomsnittleg fråvær i 2024/25 er 28,4 timar og 9,4 dagar, med eit totalfråvær på 8,1 prosent. Tala blir likevel sterkt påverka av ei mindre gruppe elevar:
- 13,5 prosent av elevane har meir enn 15 prosent totalfråvær, og det dreg gjennomsnittstala opp.
- For «snitteleven» er bildet betre: Medianen for totalfråvær er 4,6 prosent, som er under målet på 5 prosent.
Årsakene til fråvær er samansette, og kan handle om både helse, familie, psykososiale forhold og skulemiljø. Analysen viser òg at over 45 prosent av elevane med meir enn 20 prosent fråvær likevel fullfører og består.
Les heile resultatet og analysen av skuleåret 2024/2025 her.