Vestland fylkeskommune vil byggje nytt museumsmagasin
Fylkestinget har vedteke at fylkeskommunen skal vere byggherre for prosjektet Samlingssentrum Vestland i Bergen.
Store og viktige deler av den fysiske kulturarven vår blir oppbevart i magasin, og musea rapporterer om at lokala gjenstandar står i, ofte er ueigna til oppbevaring og lite tilgjengelege.
– Vi treng gode og smarte måtar å oppbevare dette på, og det skal Vestland fylkeskommune bidra til å få til. Eit av satsingsområda i utviklingsplanen vår er samarbeid, og dette tiltaket vidarefører eit velfungerande samarbeid i museumssektoren, seier fylkesordførar Jon Askeland.
Fylkestinget behandla både status og avklaringar for Samlingssentrum Vestland i møtet 10. desember.
Rom- og funksjonsprogram neste
Fylkeskommunen set i gang arbeid med rom- og funksjonsprogram for nybygget, etter at fylkestinget forskotterte kostnadane med dette i vedtaket. Det har også vore diskutert plassering av magasinet, og fylkeskommunen går no vidare med planane for den fylkeskommunale tomta på Haukås i Bergen.
– Dette vedtaket er eit stort steg i rett retning for å realisere nytt og etterlengta museumsmagasin for Hordaland. Vi skal bevare samlingane, gje tilgang til dei og planlegge for framtida. Eit nytt bygg vil bidra til betre samordning av museumsgjenstandane i Vestland og sikre betre forvaltning av dei, seier fylkesordføraren.
Samlingssentrum Vestland vil i hovudsak vere for musea i tidlegare Hordaland fylke, i og med at Musea i Sogn og Fjordane (MiSF) har fått på plass det nye magasinet Tinghuset i Angedalen i Sunnfjord. Det vil likevel vere mogleg for MiSF å levere til det nye magasinet ved behov, t.d. gjenstandar som er særleg krevjande på grunn av storleik eller kompleksitet.
Uavklart eigarspørsmål
Saka om nytt museumsmagasin har vore ute på høyring. Mange museum og kommunar har svart på høyringa og kome med tydelege tilbakemeldingar om at Vestland fylkeskommune bør vere byggherre og eige bygget. Fylkeskommunen tek no altså på seg byggherreansvaret, men eigarspørsmålet er endå ikkje avklart. Fylkesdirektøren vil arbeide vidare med dette i dialog med Bergen kommune.
Det må også avklarast både kven som skal drifte det nye magasinet, og korleis det skal finansierast. Fylkestinget legg til grunn ei tredeling av kostnadane mellom staten, Vestland fylkeskommune og Bergen kommune.
Fylkesdirektøren kjem tilbake til bygge- og driftskostnadar i politisk sak om godkjenning av rom- og funksjonsprogram.
Les meir om prosjektet Samlingssentrum Vestland i den politiske saka PS 125/2025: Moglegheitsstudie Samlingssentrum Vestland – status og avklaringar for framdrift.