Vestland fylkeskommune samlar kommunar og næringsliv i nytt forsvarsforum
Målet er å styrkje rolla til Vestlandet i den nasjonale forsvarssatsinga, spesielt ut frå styrken fylket har innan maritim sektor.
Saka oppsummert
- Forsvarsforum Vestland blir etablert som interkommunalt politisk råd
- Rådet skal styrkje rolla til Vestland i den nasjonale forsvarssatsinga
- Forumet skal byggje opp sivilt-militært samarbeid, styrkje næringsliv og kompetanse, og fremje grøn teknologi
- Fylkeskommunen skal leie arbeidet og koordinere forumet
- Fylkesordførar Jon Askeland blir leiar for styringsgruppa
- Representantskapet i Forsvarsforum Vestland IPR skal frå starten bestå av fylkesordførar i Vestland fylkeskommune, byrådsleiar i Bergen og ordførarane i Øygarden kommune, Bjørnafjorden kommune, Askøy kommune, Alver kommune, Stord kommune og Kinn kommune
Fylkestinget vedtok i møtet 1. oktober å etablere Forsvarsforum Vestland Interkommunalt politisk råd (IPR).
Rådet blir eit nytt regionalt samarbeid mellom kommunar, fylkeskommunen og relevante aktørar innan forsvar, næringsliv og kunnskapsmiljø. Forsvarsforum Vestland skal arbeide for å styrke beredskap og industri gjennom auka bruk av lokale leverandørar.
– Forsvarssatsinga som skal skje nasjonalt, vil i stor grad finne stad her langs vestlandskysten og i Nord-Noreg. Det er ei utfordring med tanke på folk og kompetanse, men og ei stor moglegheit for næringslivet vårt. Derfor etablerer vi Forsvarsforum Vestland, for å sikre at Vestland er rusta og klar for det som kjem, seier fylkesordførar Jon Askeland.
Vestland har det som trengs
– Vestland har sterke føresetnader for å spele ei sentral rolle i norsk forsvarspolitikk. Den største satsinga i Forsvaret skjer i Sjøforsvaret og på Haakonsvern, Nord-Europas største marinebase. Vi har blant anna nokre av Noregs største maritime bedrifter og tung kompetanse innan skipsbygging og industri som produserer forsvarsmateriell. I tillegg må vi saman sikre utdanning og kompetanse for den store auken i personell som Sjøforsvaret treng, seier Askeland.
– Derfor må Forsvarsforum Vestland vere ein koplingsboks mellom forsvaret og sivil sektor, slik at vi saman lukkast i totalforsvaret i Noreg, uttalar fylkesordføraren.
Haakonsvern med sine 3500 offiserar, spesialistar, sivile og vernepliktige er hovudbasen til Sjøforsvaret og Marinen i Noreg, og heimebasen til mange av Forsvarets sjøfartøy.
Endra sikkerheitspolitisk situasjon
Bakteppet for satsinga er at den sikkerheitspolitiske situasjonen i Europa har endra seg dramatisk dei siste åra, spesielt på grunn av krigen i Ukraina og auka spenning mellom Russland og Vesten. Det er òg generell økonomisk og geopolitisk usikkerheit knytt til internasjonal handel og forsvarsalliansar. Dette har resultert i behov for opprusting og betydeleg auke i europeiske nasjonar sine forsvarsbudsjett.
Må tenke nytt rundt rekruttering
Regjeringa har signalisert ei kraftig auke i bemanninga i Sjøforsvaret, og det vil bli behov innan ei rekke kompetansar og utdanningar - frå vidaregåande opplæring til universitet og høgskular. Det vert eit mål for forumet å identifisere moglegheiter for å både å kunne rekruttere rett og tilstrekkeleg kompetanse til forsvarssatsinga.
–Mangelen på arbeidskraft i maritim og teknologisk industri er alt eit faktum, og rekrutteringsbehovet vil auke med ny forsvarssatsing. Forumet skal derfor arbeide tett med mellom anna Kompetanseforum Vestland for å identifisere utdanningsbehov og sikre samspel mellom skular, fagskular, Sjøforsvaret og næringsliv, seier Askeland.
Kompetanse som vil bli etterspurd
Med den nasjonale forsvarssatsinga vil det på Vestlandet bli behov innan ei rekke kompetansar og utdanningar,frå vidaregåande opplæring til universitet og høgskular.
Eksempel er:
- verftsarbeidarar
- marin teknologi og ingeniørfag: Kompetanse innan skipsdesign, hydrodynamikk, og maritim teknologi
- elektronikk og kommunikasjon: Ekspertise innan radar, sonar, kommunikasjonssystem m.m.
- kompetanse innan informasjonsteknologi
- maritime nautiske fag, navigasjon og operasjon
- logistikk og forsyningskjede
- strategisk leiing og forsvarsplanlegging
- innovasjon og teknologiutvikling
- internasjonalt samarbeid
Berekraftig skipsfart og miljøteknologi
Forsvaret vil ta klimaansvaret sitt på alvor, og Vestland har sterke miljø innan rein skipsteknologi. Etableringa gir også moglegheit til å bruke sivil teknologi og utvikle klimavennlege løysingar i fredstid. Difor er det aktuelt å ta med næringsklynger innan berekraftig skipsfart og miljøteknologi i nettverket.
Les meir om Forsvarsforum Vestland i saka PS 44/2025 Etablering av "Forsvarsforum Vestland Interkommunalt politisk Råd (IPR)