Klart for VM i vektløfting: – Vestland treng VM
VM i vektløfting startar i Førde 2. oktober. Vestland fylkeskommune har støtta arrangementet med over 10 millionar og er saman med Sunnfjord kommune vertskap for mottakinga før opningsseremonien.
– Erfaring med å arrangere slike store meisterskap kan gjere oss meir attraktive for nye arrangement i framtida. Det skaper også samhald og styrkar både frivilligheita og lokal identitet når folk i lokalsamfunnet samlast om eit felles prosjekt. Eg ser med begeistring fram til eit strålande VM i Førde, seier fylkesordførar Jon Askeland.
Tek imot kulturministeren
Fylkesutvalet vedtok 23. september å takke ja til å vere vertskap for ei mottaking under VM. Vestland fylkeskommune har tidlegare støtta VM i fleire omgangar, med til saman 10 millionar kroner.
Til mottakinga 2. oktober kjem blant andre kulturministeren, idrettspresidenten, styre og administrasjon i International Weightlifting Federation, arrangementskomité, kommunar, større sponsorar og samarbeidspartnarar. Fylkeskommunen blir vertskap saman med Sunnfjord kommune, og mottakinga er i Førdehuset i forkant av opningsseremonien.
Opp mot 800 utøvarar
Fylkesordføraren er tydeleg på at eit arrangement som VM kan vere svært positivt for både sunnfjordregionen og heile fylket på lang sikt.
– Det gir økonomiske ringverknadar når utøvarar, støtteapparat og andre legg att pengar på hotell, restaurantar og butikkar. I tillegg blir Førde og Vestland synlege både nasjonalt og internasjonalt gjennom mediedekninga. VM har også betydning for både idrettsglede og rekruttering, seier Askeland.
VM går over ti dagar, frå 2. til 12. oktober. Det er venta mellom 600 og 800 utøvarar til Førde desse dagane, i tillegg til fleire tusen akkrediterte. Over 100 nasjonar blir representerte under meisterskapen.