Inntaket til vidaregåande klart: Opprettar 24 nye klassar i Vestland
Alle søkjarar med rett til opplæring har no fått tilbod om skuleplass på vidaregåande skular i Vestland. For å sikre plass til alle, er det oppretta 24 nye klassar i løpet av sommaren.
Saka oppsummert
- For å møte auka behov er det oppretta 24 nye klassar ved dei vidaregåande skulane.
- Over 24 000 søknader er behandla, og nesten 20 000 søkjarar har fått plass.
- 82 prosent fekk tilbod om den skuleplassen dei helst ville ha - det same som i fjor.
- Ulikheiter mellom det søkjarane har ønskt seg av yrkesfag og det skulane i nærleiken har tilbydd, auke i talet på søkjarar til yrkesfag og nye rettar i opplæringslova har skapt utfordringar med å sikre eit tilbod til alle søkjarane.
- Alle søkjarar har fått eit tilbod i tråd med retten sin, og må møte til skulestart for å behalde plassen.
Oppsummeringa er laga av KI-tenesta ChatGPT. Innhaldet er kvalitetssikra av kommunikasjonsseksjonen før publisering.
Fylkeskommunen har i år registrert og behandla over 24 000 søknader til dei offentlege vidaregåande skulane i fylket. Nesten 20 000 søkjarar er tatt inn på ulike tilbod. Alle søkjarar har fått eit tilbod som er i tråd med deira rett til skuleplass.
Etter tredje inntaksrunde har 82 prosent av søkjarane fått tilbod om den skuleplassen dei helst ville ha. Dette er det same resultatet som i fjor. Dei som har fått tilbod i Vigo i denne runden takkar ja med å møte på skulen til skulestart.
24 nye klassar
Det har i år vore større utfordringar med å sikre eit tilbod til alle søkjarane. Den største utfordringa er skilnaden mellom kva for yrkesfag søkjarane ønskjer seg, og kva skulane i nærleiken tilbyr. Dette gjeld særleg i og rundt Bergen.
I tillegg er det fleire søkjarar som har rett på skuleplass etter den nye opplæringslova, og talet på søkjarar til yrkesfag har auka over fleire år.
For å sikre eit tilbod for alle søkjarane har Hovudutval for opplæring og kompetanse gjort vedtak om at fylkesadministrasjonen kan opprette fleire klassar.
Totalt er det oppretta 24 nye klassar i løpet av inntaket. Dette har gjort at alle får eit tilbod dei har rett til, og at fleire søkjarar har fått eit tilbod dei har ønskt seg.
| Skule | Nivå | Program |
| Askøy vgs. | vg1 | Elektro og datateknologi |
| Askøy vgs. | vg1 | Teknologi- og industrifag |
| Austevoll vgs. | vg1 | Teknologi- og industrifag |
| Austrheim vgs. | vg1 | Teknologi- og industrifag |
| Austrheim vgs. | vg1 | Bygg- og anleggsteknikk |
| Fusa vgs. | vg1 | Teknologi- og industrifag |
| Knarvik vgs. | vg1 | Helse- og oppvekstfag |
| Kvinnherad vgs. | vg1 | Teknologi- og industrifag |
| Nordahl Grieg vgs. | vg1 | Studiespesialisering |
| Sandsli vgs. | vg1 | Sal, service og reiseliv |
| Sotra vgs. | vg1 | Bygg- og anleggsteknikk |
| Sotra vgs. | vg1 | Teknologi- og industrifag |
| Åsane vgs. | vg1 | Helse- og oppvekstfag |
| Åsane vgs. | vg1 | Sal, service og reiseliv |
| Austevoll vgs. | vg2 | Maritime fag |
| Bømlo vgs. | vg2 | Automatisering |
| Bømlo vgs. | vg2 | Elenergi og ekom |
| Osterøy vgs. | vg2 | Elenergi og ekom |
| Austrheim vgs. | vg3 | Påbygg 3 |
| Nordahl Grieg vgs. | vg3 | Påbygg 3 |
| Sandsli vgs. | vg3 | Påbygg 3 |
| Slåtthaug vgs. | vg3 | Påbygg 3 |
| Sotra vgs. | vg3 | Påbygg 3 |
| Årstad vgs. | vg3 | Påbygg 3 |
Samtidig som det er oppretta nye klassar, er åtte klassar justerte ned på grunn av lågt elevtal. Desse klassane er:
| Skule | Nivå | Program |
| Arna vgs. | vg1 | Helse- og oppvekstfag |
| Bømlo vgs. | vg1 | Elektro og datateknologi |
| Fitjar vgs. | vg1 | Helse- og oppvekstfag |
| Sogndal vgs. | vg1 | Studiespesialsering |
| Stord vgs. | vg2 | Elektro og datateknologi |
| Austrheim vgs | vg2 | Kjøretøy |
| Bømlo vgs. | vg2 | Industriteknologi |
| Sandsli vgs. | vg2 | Kokk- og servitørfaget |
Søkjarane sitt tilbod om opplæring er ikkje påverka av nedjusteringane.
Justeringane er gjort i tråd med den administrative fullmakta som er gitt av Hovudutval for opplæring og kompetanse. Etter justeringa har alle søkjarar til vg1 fått eit tilbod innanfor inntaksområdet sitt i tråd med regelverket.
Møt fram til skulestart
Det er viktig at alle elevar møter på skulen til skulestart der dei har fått tilbod om skuleplass. Dei som ikkje møter, mister plassen – som då blir gitt vidare til andre søkjarar. Elevane får informasjon om skulestart direkte frå skulen. Oppdatert informasjon finst òg på nettsidene til skulane.
Her er liste over ledige plasser ved dei vidaregåande skulane (PDF).
Elevar som ønskjer plass på tilbod som er ledige, kan ta kontakt med den skulen dei ønskjer å gå på.
Informasjon om skulestart
Dei vidaregåande skulane legg ut informasjon om skulestart på nettsidene sine.
Oversikt over poenggrenser ved inntak til vidaregåande skular
Oversikta viser poengsummen til sist innteke elev med ungdomsrett. Tala er henta ut etter 3. inntaksomgang i det ordinære inntaket.
Der det står «Alle» under nedre poenggrense har alle søkjarar med ungdomsrett fått tilbod.
Ved enkelte programområde vert det gitt tilleggspoeng som kan inngå i poengutrekninga. Dette gjeld for Vg1 Idrettsfag og Vg1 musikk, dans og drama.
Oversikt nedre poenggrense (PDF).
Det vart oppdaga feil i oversikt over ledige plasser for skulane Stord vgs. og Bømlo vgs. Dette vart retta opp 11. juli kl. 10:05.