Inngår samarbeidsavtale med Likestillingsenteret på Vestlandet
Vestland fylkeskommune vil gjennom samarbeidsavtalen styrke og systematisere arbeidet med å utvikle eit mangfaldig og inkluderande samfunn.
– Eit av måla i utviklingsplanen vår er at Vestland skal vere eit inkluderande fylke med trygge, attraktive og livskraftige lokalsamfunn. Eg håpar og trur at samarbeidet med Likestillingssenteret kan bidra godt til dette. Vi må jobbe saman for å styrke innsatsen for å redusere sosial ulikskap og utvikle eit mangfaldig og inkluderande samfunn, seier fylkesordførar Jon Askeland.
Fylkesutvalet vedtok å inngå avtalen i møtet 13. mai.
Demografi og likeverd
Likestillingssenteret på Vestlandet opna i november 2024. Det er del av Likestillingssenteret KUN og skal fremje likestilling og mangfald i Vestland, Rogaland og Møre og Romsdal.
– Samarbeidsavtalen støttar opp om arbeidet vårt med demografi og likeverd. Vi er forplikta til å arbeide med likestilling i alle oppgåvene og tenestene våre, og eg trur avtalen med Likestillingssenteret gjer oss i endå betre stand til å jobba kunnskapsbasert med dette, seier fylkesordføraren.
Alle offentlege styresmakter er lovpålagt etter likestillings- og diskrimineringslova § 26 til å jobbe aktivt, målretta og planmessig for å fremje likestilling og hindre diskriminering i heile verksemda si.
95 000 kr til antirasistisk arbeid
Fylkesutvalet vedtok òg å overføre inntil 95 000 kr til Likestillingssenteret på Vestlandet. Pengane skal gå til arbeid med antirasistisk sone i 2025. Fylkestinget vedtok i 2020 at Vestland fylke skal vere antirasisisk sone. Ei intern prosjektgruppe jobbar med å følgje opp dette og har blant anna fått 400 000 kr frå Barne-, ungdoms- og familiedirektoratet til arbeidet.
Likestillingssenteret på Vestlandet tilbyr mellom anna kurs, føredrag, utgreiing og sertifisering, og har utvikla ein rasismerettleiar.