Feira Atløysambandet og betre ferjeavløysingsordning
Fylkestinget gav grønt lys for byggestart av Atløysambandet innan godkjend kostnadsramme 17. juni, og ferjeavløysingsordninga er no endra til å gje rentekompensasjon for alle framtidige prosjekt.
– Denne fastlandsforbindelsen har det vore kjempa for i 50 år, og er ei historisk investering for framtida til kystsamfunnet rundt Askvoll, seier fylkesordførar i Vestland, Jon Askeland.
Fylkestinget gjorde vedtak i saka "Ferjeavløysing Atløysambandet - godkjenning av kostnadsramme og byggestart" i møte 17. juni i Florø.
– Vi har jobba for å betre ordninga med ferjeavløysing og i dag kan vi også gle oss over gjennomslag på Stortinget for endring av støtteordninga, som vil gjelde alle framtidige ferjeavløysingsprosjekt, seier fylkesordføraren.
Betre renteordning for ferjeavløysingsprosjekta
Ferjeavløysingsordninga er i utgangspunktet til god hjelp med mange viktige fylkesvegprosjekt som erstattar ferjesamband i Vestland. Men slike bruprosjekt er enno dyre og tunge investeringar for ein pressa fylkeskommuneøkonomi, og Vestland fylkeskommune har kjempa for betring av støtteordninga.
– No seier Stortinget at alle ferjeavløysingsprosjekt får inntil 50% rentekompensasjon første fem åra, noko som tidlegare berre gjaldt prosjekt som blir ferdigstilte innan 2027. Fylkestinget ba departementet om dette seinast i oktober i fjor. Vi kjempar vidare for å betre støtteordninga ytterlegare, men i dag feirar vi ein delsiger og byggestart for Atløysambandet! seier Askeland.
Fylkestinget i Vestland bad departementet gjere rentekompensasjonsordninga i ferjeavløysingsprosjekt om til ei varig ordning utan krav om ferdigstilling innan 2027 i fylkestingsmøtet i oktober 2024.
Tilgjenge og tryggleik for lokalsamfunna
Atløysambandet i Askvoll kommune vil erstatte dagens ferjetilbod med fastlandsforbindelse over fleire bruer og vegstrekningar. Den største brua blir Granesundbrua, og det blir to mindre bruer over Olssundet og Sauesundet.
– Vi skal ha trygge og attraktive lokalsamfunn. Sambandet vil gi varig samfunnsnytte for innbyggjarar, næringsliv og tenesteyting på Atløyna og i heile regionen, og vi er glade for å endeleg kunne bestemme byggestart, seier Askeland.
Atløysambandet er forventa ferdigbygd i 2030 og er eit stort investeringsprosjekt for fylkeskommunen, med eit kostnadsoverslag på 1 830 millionar kroner (2025-kr.)
Realisering av prosjektet vil utløyse ferjeavløysingsmidlar på 17,720 millionar kroner (2023-kr.) i 45 år.
Viktige fastlandsprosjekt må få betre støtte
– Vår økonomiske belastning knytt til ferjeavløysing må reduserast ytterlegare. Vestland fylkeskommune er særs gjeldstyngd, og det utfordrar evna vår til gjennomføring av samtlege investeringar framover. Derfor kjempar vi fortsatt for betring av ordninga, både av utbetalingsmodellen på 45 år og at fylkeskommunen må ta all risiko med kostnadsauke i prosjekta, seier Askeland.
Vestland har ni "bru for ferje"-prosjekt som er godkjente som ferjeavløysingsprosjekt: Ytre Steinsund bru, Ytre Nordfjord/Kystvegen, Atløysambandet, Masfjordsambandet, Bjelkarøysambandet, Huftarøy-Reksteren, Huglo-sambandet, Sunnfast og Fjellbergsambandet. Ytre Steinsund bru hadde byggestart i 2024, og no blir totalentreprise for Atløysambandet lyst ut hausten 2025 med kontraktinngåing innan sommaren 2026.
– Ny bru og fastlandsforbindelse kan hjelpe næringslivet i nokre av landets fremste verdiskapingsregionar og gjere fleire område i Vestland meir attraktive å bu og arbeide i, difor er ei betre støtteordning viktig, seier Askeland.