To millionar til trygg russefeiring

Pengane skal gå til tilrettelegging og trygging av russearrangement i regi av friviljuge og ideelle organisasjonar. Arrangørar i heile Vestland fylke må søkje om midlar til gjennomføringa seinast 11. april til avdelingsdirektør for opplæring og kompetanse, som prioriterer søknadene og avgjer tildeling, og det er fortløpande behandling av søknader.

Vakthald og sikker transport

Midlane skal gå til sikring av område for arrangement, tilfredsstillande vakthald, sanitære fasilitetar, avfallshandtering og felles sikker transport. Det blir arbeidt vidare med finansiering frå andre partar.

– Vi vil gi russen ein trygg stad å vere. I Bergen har det fylkeskommunale området nær Hordnesskogen peika seg ut. Området må vere inngjerda, ha inngangskontroll og tilstrekkeleg vakthald. Vi må og ha toalett og trygg transport til næraste bybanestopp. Russen har gitt oss tydelege ønske om å ha tilgang til ein trygg stad der bussane kan stå, seier Askeland.

Samarbeid med eksterne

I Breim samalst russen for det årlege fylkestreffet for russen natt til 1. mai.

– Dette fylkestreffet har vore i mange år, og mange frivillige aktørar er med, slik at det blir trygt og inkluderande. Vi vil vurdere å støtte arrangementet økonomisk og syte for trygg transport. For å få til desse arrangementa, må vi få til samarbeid med eksterne aktørar som er ansvarlege, seier Askeland.

Rett til trygt og godt skulemiljø

Politikarar og russ, gjennom fleire år, oppmoda i fjor haust om å hjelpe russen med å finne ein trygg stad for russefeiringa.

– Vi har sett at ein del elevar utfordrar russefeiringa og retten til å tilhøyre eit godt og inkluderande skulemiljø. I heile landet blir det meldt om utanforskap, kjøpepress og ekskludering. Men opplæringslova gir alle elevar rett til eit trygt og godt skulemiljø som fremjar helse, trivsel og opplæring. Med desse tiltaka håpar vi å bidra til ei trygg og inkluderande russetid, seier Askeland.

Skal ikkje vere arrangør

Sjølv om Vestland fylkeskommune engasjerer seg for at russen skal ha ei god russetid, inneber ikkje det at fylkeskommunen skal vere arrangør.

– Russefeiringa er privat, og vi har sett store utfordringar, spesielt i bergensområdet i mange år, med russebussar som er rullande festlokale som trekkjer til seg mange ungdommar og vaksne, som ikkje er russ. Når vi no engasjerer oss i dette, er det ikkje for at vi skal arrangere russetida. Den skal framleis vere privat, men vil skal legge til rette, i samarbeid med aktuelle partar, for at russetida skal bli trygg og inkluderande dei to helgene i tillegg til 1. mai dette gjeld, understrekar Askeland.

Samarbeid

I samarbeidsgruppa som koordinerer arbeidet med russetida, er desse med: Avdelingsdirektør for opplæring og kompetanse, rektorar frå vidaregåande skular, politiet, Trygg Trafikk, Statens vegvesen,  helsesøster frå Bergen kommune og SLT, som er samordning av lokale rus- og kriminalitetsforebyggande tiltak.

– Samarbeidsgruppa har godt samarbeid med russerådet, der alle russepresidentane frå alle dei offentlege og private vidaregåande skulane i Vestland er med. Vi har ein skriftleg avtale med russen om ein inkluderande, moderat og trygg russefeiring, seier fylkesordførar Jon Askeland.

Evaluering

Nærare retningsliner for tildeling av midlar til russefeiring skal fylkesdirektøren utarbeide. I etterkant skal det rapporterast om bruken av midlane.

– Støtta vår til russefeiringa er ei ordning for i år. Vi skal evaluere dette, drøfte erfaringar og vurdere om vi skal medverke i åra som kjem, seier fylkesordførar Jon Askeland.