Hels på Ask - chatboten med stor suksess
Vestland fylkeskommune sin chatbot gir deg raske svar innan dei fleste fagområda våre. No har han også fått namn og utsjånad.
– Noko av det viktigaste digitaliseringsarbeidet vi kan gjere, er å gjere tenestene våre enno meir tilgjengelege for brukarane. Ved å etablere chatbotløysing på nettsidene våre, kjem vi nærare brukarane, samstundes som vi frigjer kapasitet i organisasjonen til andre oppgåver, seier Tom Sølve Myklebust, seksjonssjef for digitalisering i Vestland fylkeskommune.
Frå starten våren 2021 og fram til januar 2023 har Ask svara ut 62 000 spørsmål i 33 000 samtalar.
– Dette er gode tal for ein chatbot, og noko vi har fått til takka være våre dyktige ai-trenarar, seier Geir Ove Hall Johnsen, prosjektleiar for chatbot-prosjektet.
Stort trykk i pandemien
Det var våren 2021 fylket bestemte seg for å utvikle ein chatbot. Bakgrunnen var det store trykket frå elevar som hadde spørsmål om korleis pandemien påverka skulekvardagen. Chatboten gjorde det mogleg å nå kjapt ut til alle elevar og føresette med ny og oppdatert informasjon, og best av alt: den jobba døgnet rundt.
Chatboten blei deretter raskt lært opp til å svare på spørsmål om IKT og tannhelse. Innan dei fagområda chatboten var lært opp til å dekke, fekk folk tilfredsstillande svar i nær 90 prosent av tilfella.
Veg, tannhelse og mykje meir
Ask kan no svare på spørsmål innan store delar av fylkeskommunen sine tenesteområde, til dømes spørsmål om vidaregåande opplæring, veg, politikk, tannklinikkar, privatisteksamen, TT-kort og mykje meir. Ask gir brukarane ein snarveg til informasjon og hjelp. Han kan svare på spørsmål frå fagfelt som dekker 83 prosent av nettsidetrafikken på vestlandfylke.no. Det vil seie dei tema som gjeld sidene dei fleste oppsøker når dei er inne på vestlandfylke.no.
Blir stadig betre
Men Ask er på ingen måte utlært. Fylket sine AI-trenarar jobbar til ei kvar tid med å gjere Ask i stand til å svare på nye fagfelt og spørsmål. Han blir stadig betre.
– Vi utviklar Ask kontinuerleg etter kva innbyggarane søker om hjelp til. Og dette er berre starten. Målet er at publikum i størst mogleg grad skal kunne løyse si eiga sak, anten dei søker oppdatert informasjon, skal søke om tilskot eller melde feil og manglar, seier Hall Johnsen.
Han legg til at analyser av nettsidene fortel at vi treff godt på behova, også etter Ask sine kunnskapsfelt blei utvida med fagområda fylkesveg og kultur. Han ser fram til å utvikle Ask vidare i tett samarbeid med leverandøren Avo consulting.
Fekk namn og personleg uttrykk
I ein namnekonkurranse i haust, kom det inn mange gode forslag til kva chatboten skulle heite. Eit utval av desse låg ute for avstemming og namnet Ask blei stemt til topps. Ettersom dette viste seg å vere eit forslag frå eit medlem i prosjektgruppa for chatboten, blei det bestemt at det skulle trekkast ein vinnar blant alle namneforslaga som kom inn. Vinnaren blei Magdalena Sande Bakke. Ho blir kontakta og får premien, ein Sandberg Solar 6-panel Powerbank 20000, sendt i posten.