Atløysambandet blir gjennomført som ferjeavløysingsprosjekt
Fylkesvegprosjektet med fastlandssamband til Atløy får 17,7 millionar kroner årleg gjennom ferjeavløysingsordninga, og fylkestinget vedtok løyving til prosjektet allereie i 2024. – Eit viktig finansieringsbidrag, seier fylkesordførar Jon Askeland.
Fylkestinget stadfesta i møtet 14. desember Atløysambandet sin status som ferjeavløysingsprosjekt, og gjorde i handsaminga av budsjett 2024/økonomiplan 2024–2027 vedtak om midlar til prosjektet i 2024.
Endeleg oppstart
Atløy i Askvoll kommune skal bindast saman med fastlandet og kommunesenteret med tre bruer, og kampen for fastlandsforbindelse har vore lang for lokalsamfunnet med 3000 innbyggarar. Fylkeskommunen sende første søknad om førehandsavklaring av prosjektet i 2017, og i 2023 vart prosjektet godkjent som ferjeavløysingsprosjekt av departementet.
– I denne kystkommunen er brusamband eit svært viktig grep i samfunnsutviklinga. Gode samferdsleløysingar skaper gode moglegheiter og verdiskaping. Her er det mange som har takla store hinder og vore utrøyttelege med å få prosjektet fram og godkjent. Atløyfolket har stått fremst i å forme ferjeavløysingsordninga slik ho er i dag, seier fylkesordførar i Vestland, Jon Askeland.
Viktig finansielt bidrag
Det er ferjesambandet Askvoll–Gjervik som vil bli avløyst av Atløysambandet. Vedtaket frå Kommunal- og distriktsdepartementet seier at prosjektet utløyser 17,72 millionar kroner i årlege ferjeavløysingsmidlar i 45 år. Det er om lag heile beløpet ferjeavløysingsordninga kan dekke, som er dei nominelle byggekostnadane og halvparten av dei pårekna rentekostnadane. Resten av kostnadane fell på fylkeskommunen som fylkesvegeigar.
– Ferjeavløysingsordninga vil gi eit godt bidrag til fylkeskommunen si finansiering av prosjektet, og gjer at vi no kan sette i gang naudsynt førebuingsarbeid allereie i 2024, seier Askeland.
Han legg til at fylkestinget skal godkjenne eit oppdatert kostnadsoverslag att før anbodet kan gå ut. Det siste kostnadsoverslaget for prosjektet er på 1,5 milliarder kroner.
Bygge bru mellom folk og næringar
No skal det først gjerast vindmålingar, arkeologiske utgravingar og anna førebuande arbeid. Så vil fylkeskommunen lage eit konkurransegrunnlag med eit nytt kostnadsoverslag, som skal handsamast av fylkestinget før ein totalentreprise eventuelt vert lyst ut på anbod og spaden sett i jorda. Det nye brusambandet med tilhøyrande fylkesveg vil bli 5,2 km langt og få gang- og sykkelveg. Den største brua vil gå over Granesundet og vere omlag 900 m lang med ei seglingshøgde på 42 m.o.h.
– Det er aldri feil å bygge bru mellom folk og næringar, og slik binde fylket saman, seier fylkesordføraren.