Startar fagskuleutdanning i osteproduksjon

Utdanninga blir lyst i samla opptak til høgare utdanning med søknadsfrist 20. april. Til hausten er det skulestart for utdanninga.

– Bak denne fagutdanninga er det mangeårig laginnsats for å sikre framtida for osteproduksjon her i landet. Handverksysteria har vore svært sårbare, og avhengig av nokre få eldsjeler for å sikre rekruttering og kompetanse. Med fagskuletilbodet kan vi endeleg senke skuldrane og heve blikket. Det ambisiøse målet om fast plass i verdstoppen er innan rekkevidde, seier Turid Nordbø, leiar i Norsk Gardsost.

Over 100 ysteri i Noreg

Her i landet er det over 100 ysteri. Dei har fått mange medaljar i oste-VM dei siste åra. Men sjølv om det er mange verksemder og god vekst, har næringa lenge mangla eit solid utdanningstilbod. Alle meieriskular er nedlagde.

– Kompetansenettverk Lokalmat Vest har i 20 år hatt ystekurs ved Sogn jord- og hagebruksskule. Dei siste åra har kursa vore fullteikna med venteliste. Dette er gode kurs, men for å bygge og drive ysteri er tre veker med utdanning langt ifrå tilstrekkeleg, seier Nordbø.

Handverk

Den nye fagskuleutdanninga har fått namnet Handverksysting – verdiskaping i mjølkeforedling. Fagskulen Vestland står bak og samarbeider med Sogn jord- og hagebruksskule og Trøndelag høyere yrkesfagskole, avdeling Trondheim.

Utdanninga er nettbasert over to år, men også med samlingar ved dei to skulane i Aurland og Trondheim.

– Utdanninga rettar seg mot dei som driv eller er tilsette på handverksysteri, dei som ønskjer å starte ysteri eller jobbe hos andre og produksjonsmedarbeidarar ved større meieri, seier Nordbø.

Oppgradert skule i Aurland

Dei to studiestadane i Aurland og Trondheim utfyller kvarandre. I Trondheim har dei eit treningsmeieri med litt meir industriell tilnærming, i tillegg til fagkompetanse på mjølkeforedling, økonomi og marknadsføring. Ysteriet i Aurland er nyleg oppgradert i romslege og moderne produksjons- og undervisningslokale. Skulen i Aurland sit også på fagkompetansen og erfaringane frå 20 år med kurs og rettleiing. Som ein bonus er all landbruksdrift og vidareforedling i Aurland økologisk, og kan bidra sterkt til studentar med interesse for dette.

Skal styrke fagkompetansen

– Utdanninga er viktig for noverande og kommande tilsette i meieri-industrien, anten det er snakk om små eller større ysteri. Formatet med samlingar over to år høver godt for dei som er i jobb. Studiet skal styrke fagkompetansen på ost og ysting, og bidra til at vi kan auke kvaliteten på norsk ost på tvers av meieri-Noreg, seier Kjetil Holstad, leiar for fagavdeling ost og fett i TINE.

Kvalifikasjonar for å søke

Krava til å søke utdanninga er fullført vidaregåande skule innanfor restaurant- og matfag eller naturbruk, eller relevant yrkeserfaring. Det er ikkje krav om generell studiekompetanse. Dei som fullfører utdanninga, får ein fagskulegrad i handverksysting og får tittelen ysteteknikar.

Studieplanen er utarbeidd saman med eit fagleg råd samansett av:

• Norsk Gardsost
• TINE SA
• Rørosmeieriet
• Norsk Meieriteknisk Forening
• Kompetansenettverk Lokalmat Vest                       
• Norges Bondelag
• Norsk Bonde- og Småbrukarlag
• Ystebui