Vestland fylkeskommune har ansvar for kollektivtilbodet i Vestland. Med støtte frå Miljøløftet har vi dei siste åra oppgradert mange busshaldeplassar slik at dei får universell utforming. Dette gjer det mogleg for alle å reise kollektivt – anten du brukar rullestol, har med barnevogn eller bagasje.
Kantstopp er tilrådd løysing i tettbygde strøk fordi det:
- Gjev bussen betre framkomst
- Reduserer stopptida
- Krev lite areal
- Er enklare og billigare å drifte og vedlikehalde
- Kostar mindre å byggje enn busslomme
Statens vegvesen sin handbok V123 tilrår kantstopp som normalløysing i byar og tettstader. Kantstopp er aktuelt der årsdøgntrafikken er under 10 000 og fartsgrensa er 50 km/t eller lågare. I Apeltunvegen er årsdøgntrafikken 6 500, og planlagd skilta fartsgrense er 30–40 km/t.
Kvifor ikkje nye busslommer?
Nye busslommer med universell utforming krev mykje meir areal enn dei gamle haldeplassane. Det er sjeldan plass til dette utan at ein må inn i sideareal – noko som ofte inneber sprenging i fjell, støttemurar eller kjøp av privat grunn. Kantstopp er difor nesten alltid den rimelegaste og mest praktiske løysinga.
Er kantstopp trygt?
Ein TØI-rapport frå 2019 analyserte trafikkulukker ved over 16 000 haldeplassar i norske tettstadar i perioden 2014–2018. Rapporten fann ingen tydeleg støtte for at kantstopp er farlegare enn busslomme. Trafikksikkerheita kring alle tiltaka i Apeltunvegen er likevel nøye vurdert.
Nullvekstmålet
Gjennom byvekstavtalane samarbeider stat, fylkeskommune og kommune om å avgrense veksten i biltrafikk. Veksten i transport skal i staden takast med gåing, sykling og kollektivreiser. Oppgraderinga av Apeltunvegen er eit bidrag til dette målet.
