Utlysing av forprosjekt - Forskingsfinansiering Vestland

Vestland fylkeskommune lanserer Forskingsfinansiering Vestland – ei ny ordning som skal styrke forskingsbasert innovasjon gjennom støtte til forprosjekt i næringslivet.

Vestland fylkeskommune styrkjer arbeidet med næringsretta forsking i fylket gjennom etablering av ei ny ordning, Forskingsfinansiering Vestland.

Forskingsfinansiering Vestland skal støtte forprosjekt for bedrifter som ønskjer å gå vidare med forskingsbasert innovasjon. Ordninga skal liggje på eit nivå over FORREGION, men under Forskingsrådet sine meir omfattande ordningar, og skal mellom anna finansiere forprosjekt med inntil 12 månaders varigheit.  

Målet er å kunne finansiere mellom 15 og 20 prosjekt i året, og ordninga skal nå bedrifter i heile Vestland. Det er sett av 8 millionar kroner til ordninga i 2026.

Midlane vert lyste ut 2. mars 2026, med søknadsfrist 15. mai for behandling før sommaren. 

Forprosjektet skal vere eit innleiande forskingsarbeid. Forprosjektet skal medverke til å utvikle eit større forskings- og utviklingsprosjekt (FoU-prosjekt), som støtter opp om innovasjon og berekraftig verdiskaping i næringsliv. 

Forskingsfinansiering Vestland lyser ut inntil 8 nye millionar kroner til forprosjekt i 2026 med slike tematiske prioriteringar: 

  • Forsking som kan bidra til sirkulær og berekraftig næringsutvikling forankra i vestnorske naturressursar, fortrinn og kompetansemiljø. 
  • Forsking på utvikling av utsleppsfri teknologi og digitalisering innan fagområde der Vestland fylke har særlege fortrinn, med særleg vekt på ny kunnskap om teknologisk, biologisk og økonomisk grunnlag for berekraftig vekst innan dei marine næringane. 
  •  Forsking som gir meir kunnskap om føresetnader for vellukka sirkulærøkonomiske løysingar, til dømes basert på industriell symbiose. 
  •  Forsking på føresetnader for eit grønt reiseliv med destinasjonsutvikling basert på lokal mat- og drikkeproduksjon samt kultur- og naturressursar. 
  • Utfordringar knytt til å utvikle helseindustri som eit viktig næringsområde med stort eksportpotensial for bedrifter i Vestland fylke må òg adresserast gjennom forsking. 

Forskingsfinansiering Vestland kan dekke inntil 70 prosent av kostnadene i eit forprosjekt. Bedrifta må samarbeide med ein godkjend forskingsorganisasjon og minimum 70 prosent av støtta frå Forskingsfinansiering Vestland skal gå til innkjøp av FoU-tenester.   

Søknader levert innan 15. mai får vedtak før utgongen av juni. 

Søknaden må få fram korleis prosjektet kan bidra med ny kunnskap som er viktig både for bedrifta og for samfunnet elles. Det må kome klart fram i søknaden kva kunnskapsutfordringar som skal løysast ved forsking for å nå innovasjonen bedrifta ønsker seg.  

Du kan skrive søknaden på norsk eller engelsk. 

Kommersielle føretak med verksemdsadresse i Vestland fylke kan søkje. Føretaket må vere eit aksjeselskap med tilsette i prosjektperioden.

Roller og deltaking frå prosjektansvarleg søkjar 

Prosjektansvarleg er føretaket/bedrifta som søkjer om støtte. Administrativt ansvarleg/kontaktperson er den personen som har fullmakt til å representere og forplikte prosjektansvarleg søkjar.  

Dersom prosjektet er eit samarbeid mellom fleire bedrifter, skal prosjektansvarleg sende inn søknaden på vegne av alle samarbeidspartnarane.  

Det vert oppmoda til mangfald og god kjønnsbalanse i prosjektorganiseringa. 

Krav til prosjektleiar 

Prosjektleiar er fagleg ansvarleg og må ha solid kompetanse på temaområdet i søknaden og/eller prosjektleiarkompetanse. Prosjektansvarleg kan vere tilsett hos prosjektansvarleg eller hos samarbeidande FoU – organisasjon. 

Krav til innkjøp frå ein FoU-organisasjon 

Prosjektansvarleg må samarbeide med ein eller fleire godkjende forskingsorganisasjonar om prosjektet. Desse skal registrerast som FoU-leverandør i søknadsskjemaet og bør bidra i arbeidet med utforming av søknaden. Det må kome tydeleg fram av søknaden kva FoU organisasjonen skal bidra med i prosjektet.  

Samarbeidet med FoU organisasjonen skjer i form av eit innkjøp. Minst 70 % av støtta frå Forskingsfinansiering Vestland skal gå til innkjøp av FoU-tenester. Berre organisasjonar på Forskingsrådet si liste over godkjende forskingsorganisasjonar kan vere norske FoU-leverandørar i prosjektet.   

Offentlege universitet og institutt i utlandet kan også være FoU-leverandørar. I prosjektsøknaden må deira faglege kompetanse på relevante fagområde i prosjektet vere godt skildra og dokumentert.  

Kostnader til FoU organisasjonar skal førast som Innkjøp av FoU i søknadsskjema.  

Samarbeid med andre bedrifter 

Dersom prosjektansvarleg (søkjar) kjøper varer eller tenester for ei anna bedrift og betaler på vanleg måte er dette ikkje eit samarbeid (men innkjøp). Kostnadene for slikt innkjøp vert ført som «Andre driftsutgifter» i søknadsskjema.  

Eit faktisk samarbeid mellom bedrifter/føretak er ikkje innkjøp. Slikt samarbeid er kjenneteikna av at partane utvekslar kunnskap eller teknologi for å nå eit felles mål. Dei organiserer arbeidsdeling i prosjektet, og deler risiko og resultat.  

Kostnader for timar brukt i faktisk samarbeid vert ført som Personal- og indirekte kostnader i søknadsskjema. Desse bedriftene/føretaka kan også føre lønsutbetalte timar som eigeninnsats i prosjektet. 

Prosjektansvarleg og dei som inngår i eit faktisk samarbeid skal avtale fordeling av rettigheiter og pliktar knytt til prosjektgjennomføring og prosjektresultat. Det er ikkje krav til å legge slik avtale ved søknaden. 

 

Aktivitet vi kan støtte  

Du kan søke om støtte til å dekke faktiske kostnader som er nødvendige for å gjennomføre prosjektet. Alle aktivitetar må vere definert som industriell forsking og/eller eksperimentell utvikling. 

- Industriell forsking: Handlar om å etablere ny kunnskap eller ferdigheiter for å utvikle nye eller forbetra produkt, prosessar eller tenester. 

- Eksperimentell utvikling: Handlar om å nytte eksisterande kunnskap på nye måtar eller på nye område for å utvikle nye eller forbetra produkt, prosessar eller tenester. 

Kostnadskategoriar 

Følgande kostnader kan inngå i prosjektet:  

  • Personalkostnader og indirekte kostnader hos bedrifta/samarbeidande bedrifter  

  • Innkjøp av FoU-tenester frå godkjend forskingsorganisasjon oppgitt i søknadsskjemaet  

  • Andre driftskostnader knytte til prosjektet  

Denne støtteordninga dekker ikkje kostnader knytt til utstyr, bortsett frå materiell som er nødvendige for å gjennomføre prosjektet. Desse kostnadene skal i tilfelle førast under Andre driftskostnader.  

 

Støttebeløp   

Søkarane kan få dekt mellom 200 000 og 500 000 kroner. Ein kan få dekt inntil 70 prosent av godkjende prosjektkostnader. 

Prosjektansvarleg og samarbeidspartnar(ar) skal finansiere minst 30 % av totale prosjektkostnader i form av eigeninnsats eller kontantbidrag. 

Merk at det er ulik støttegrad for aktivitet som er Industriell forsking (inntil 70 % for SMB bedrifter) og Eksperimentell utvikling (inntil 50 % for SMB bedrifter). I prosjektskildringa må alle aktivitetar knytast til ein av desse kategoriane.   

Det følgjer av dette at støttegraden er ulik om bedriftene bak søknaden er store, mellomstore eller små. For innvilga søknader bli endeleg støttebeløp fastsett i tilsegnsbrev. Ta kontakt med Vestland fylkeskommune på forsking@vlfk.no dersom spørsmål om dette. 

 Eigenfinansiering for prosjektansvarleg og samarbeidande bedrifter 

  • Eigeninnsats er timar som er dokumentert med utbetalt timeløn til personar tilsett hos søkjar eller hos samarbeidande bedrifter i prosjektet.  

  • Eigenfinansiering er kontantbidrag som søkjar eller samarbeidande bedrifter bidrar med.  

  • Timar må reknast som "personalkostnader og indirekte kostnader", basert på faktiske og rekneskapsførte utgifter.  

  • Timesatsen for eigne tilsette er avgrensa til 1 promille av avtalt og reell årslønn ved utgangen av prosjektperioden eller inntektsåret. Timesatsen kan ikkje overstige 1500 kroner per time.  

  • Andre relevante driftskostnadar som bedriftene betaler sjølve, kan også inkluderast som eigeninfinansiering – då rekna om til eit kontantbidrag.  

  • Prosjektansvarlege og partnarar som har eigeninnsats i form av utbetalt timeløn må vere ajour med innbetaling av arbeidsgivaravgift og skattetrekk. 

Timeprisar hos leverandørar 

FoU leverandøren sine kostnader skal førast som eit innkjøp. Her er det opp til partane å avklare timeprisen FoU leverandøren skal kunne nytte.  

Handtering av meirverdiavgift (mva):  

  • I budsjett og prosjektrekneskap skal kostnader førast utan mva.  

  • Bedrifter deltar i prosjektet betaler mva. for kjøp som vanleg, og fører mva i eit eige mva.-register for refusjon frå staten etter gjeldande reglar.  

  • Føretak som ikkje er registrerte i Meirverdiavgiftsregisteret vil kunne føre mva. som kostnad i prosjektet.  

 

Støtte kan ikkje nyttast til  

  • Skriving av søknader til nasjonale og regionale programmer  

  • Kjøp av utstyr  

  • Marknadsundersøkingar og marknadsføring  

  • Etablering av nettverk, klynger eller konsortium  

  • Kartlegging av forskingslitteratur  

 

  • I søknadsskjemaet må du informere om det er søkt støtte til same prosjekt/aktivitet frå andre offentlege støtteordningar. 

 

Steg for steg  

1. Forbered dokumentasjon  

  • Prosjektskildring (5 sider) – NB! Mal er å finne nedst på sida 

  • Hugs CV for prosjektleiar, forskingsmiljø og andre sentrale personar i arbeidet 

  • Skjema for partnaropplysningar  

  • Eigenerklæringsskjema  

2. Elektronisk søknadsskjema  

  • Fyll ut elektronisk søknadsskjema  

  • Last opp vedlegg frå steg 2 

3. Send inn søknaden  

 
 
 
  • Søknaden må vere sendt inn via Regionalforvaltning.no
  • Heile søknadsskjemaet må vere fylt ut  
  • Obligatoriske vedlegg er lagt ved   
  • Søkjar må vere i definert målgruppe  
  • Søknaden må vere innan mål for ordninga og kva det kan bli gitt støtte til  
  • Prosjektet må ha ein fullstendig finansieringsplan ved søknadstidspunktet, søknader som ikkje fyller krava vil kunne bli avvist på formelt grunnlag.  

Forskingsfinansiering Vestland kan ikkje gi støtte til føretak i vanskar. «Begrepet foretak i vanskeligheter (FIV) er definert i EUs Gruppeunntaksforordning https://www.forskningsradet.no/skattefunn/statstottereglene/vansker/   

Når du trykker «Opprett søknad» kjem du til REGIONALFORVALTNING.no der søknaden skal leverast.  

Du kan lagre og endre søknaden mens du arbeider med den. Når søknaden er sendt inn, kan du ikkje endre den. Dersom det likevel er behov for å gjere endringar må du kontakte Vestland fylkeskommune på forsking@vlfk.no   

  • Prosjektskildring på maks 5 sider. Bruk standard mal du kan laste ned i søknadsportalen. Vi vurderer berre prosjektskildringar som er skrivne i denne malen.  

  • CV for prosjektleiar  

  • Skjema for partnaropplysningar. Alle bedrifter som er partnarar i prosjektet – også bedrifta som er ansvarleg søkar – skal fylle ut dette skjemaet. Bruk standard mal som du kan laste ned nedst på sida. FoU-leverandørar treng ikkje fylle ut partnarskjema.   

  • Eigenerklæring for private bedrifter. Bruk standard mal som du kan laste ned nedst på sida.  

Alle vedlegga skal være i PDF-format. Vær nøye med å laste opp riktig vedlegg, ettersom det ikkje er lagt inn tekniske avgrensingar på kva slags dokument det er mogleg å laste opp.  

Søknader som ikkje oppfyller krava over, kan bli avvist utan fagleg vurdering.  

OBS! Andre vedlegg enn dei som er spesifisert ovanfor vil ikkje bli vurdert.  

 

 

Dersom prosjekt som har fått støtte ikkje blir gjennomført eller har manglar ved rapportering, kan Vestland fylkeskommune krevje tilbakebetaling av midlar.  

Administrasjonen i Vestland fylkeskommune vurderer om søknaden fyller formelle krav og er innanfor formål, tema og rammer for utlysinga. Søknader med formelle feil kan bli avvist utan vidare fagvurdering. Søknader utan formelle feil blir vurdert av eit regionalt fagpanel. 

Administrasjonen vurderer også Regional relevans. I tillegg vil det bli lagt vekt på Etikk, Miljøkonsekvensar, Kjønnsbalanse i prosjektet og Kjønnsperspektiv i forskinga, der det er relevant. 

Eit fagpanel vurderer: 

Forsking og innovasjon 

• I kva grad representerer innovasjonen noko nytt? 
• I kva grad er det gjort sannsynleg at innovasjonen vil realisere ei moglegheit, løyse ei utfordring og/eller møte eit erkjent behov? 
• I kva grad har prosjektet potensial for å bringe fram ny kunnskap? 
• I kva grad er FoU-aktivitetane nødvendige for å lukkast med innovasjonen? 
• I kva grad bygger prosjektet på relevant og oppdatert kunnskap? 
• I kva grad nyttar prosjektet relevante og anerkjente FoU-metodar? 

Verknader og effektar 

Verdiskaping 
• I kva grad er det gjort sannsynleg at prosjektet vil ha potensial for berekraftig verdiskaping (sysselsetting, miljø, konkurranseevne, kommunal tenesteyting med vidare)? 
• I kva grad er det gjort sannsynleg økonomiske gevinstar for søkjar og eventuelle partnarar? 
 
Regional betyding 
• Er det gjort sannsynleg at prosjektet vil bidra til å løyse samfunnsmessige utfordringar i Vestland? 
• I kva grad har prosjektet tydeleg og truverdig berekraftprofil? 
 
Regional kunnskapsoppbygging 
•I kva grad er det gjort sannsynleg at prosjektet vil bidra til kunnskapsoppbygging i Vestland? 
 
Vidareføring i hovudprosjekt 
• I kva grad er det gjort sannsynleg at prosjektet vil bli vidareført i eit hovudprosjekt (finansieringskilde, forankring og potensielle partnarar)? 

Gjennomføring 

Kvalitet på organisering av prosjektet: 
• I kva grad er det samanheng mellom mål, delmål og aktivitetar? 
• I kva grad er arbeidsplanen og ressursane i tråd med mål, tidsplan og leveransar i arbeidspakkane? 
• Er tidsplan og ressursbruk realistisk i forhold til planlagde aktivitetar? 
 
Kvalitet på prosjektleiar og prosjektgruppe: 
• I kva grad har prosjektleiar relevant kompetanse og erfaring for å leie eit FoU-prosjekt retta mot innovasjon og verdiskaping? 
• I kva grad har prosjektgruppa den nødvendige kompetansen og ekspertisen for å gjennomføre prosjektet på ein effektiv måte? 
• I kva grad er leiing og styring i prosjektet organisert på ei eigna måte?  

 Det blir gitt karakterar til kvart kriterium og ein samla karakter.