Høyring og offentleg ettersyn: Handlingsprogram for folkehelse Vestland 2026–2029

Høyringsperiode

26. august–8. oktober 2025

Frist for høyring og ettersyn

Fylkesutvalet vedtok i møte 21.august 2025 å sende rullert handlingsprogram ut på høyring (PS 181/2025). Frist for innspel til forslaget til Handlingsprogram for folkehelse Vestland 2026–2029 er 8. oktober 2025.

Du sender fråsegn i digitalt skjema. Høyringsinnspela blir tatt med i arbeidet med rullering av eksisterande handlingsprogram, som blir vedtatt i fylkestinget i desember 2025. Innkomne fråsegn blir gjort offentlege når fristen er ute.

Vi vil ha dine innspel!

For å få eit handlingsprogram for folkehelse som bidreg til ei god samfunnsutvikling og som kan brukast av både fylke, kommunar og andre aktørar treng vi dine innspel.

Vi oppmodar kommunar, statlege organ, næringsliv, frivilligheit og alle som er interesserte innanfor det breie fagfeltet folkehelse i fylket vårt til å gje innspel. Alle arbeider med folkehelse innanfor sitt fagfelt uansett om du arbeider med beredskap, klima, integrering, bustadutvikling, frivilligheit, kollektiv, helse osv.

Ope informasjonsmøte

Torsdag 25. september inviterer vi til digitalt informasjon- og innspelsmøte om handlingsprogrammet. Meld deg på i lenke til høgre. 

Kva ynskjer vi dykkar syn på? 

Vi vil ha innspel og kommentarar til mål, delmål og strategiar programforslaget. 

• Er dette eit handlingsprogram som kan bidra til strategisk retning for folkehelsearbeidet i din kommune eller organisasjon? 
• Møter satsingsområde, mål og strategiar utfordringane frå folkehelseoversikt for Vestland 2023 - 2027? 

Kvifor rullering av handlingsprogrammet?

Utviklingsplan for Vestland 2024–2028 viderefører framleis dei regionale folkehelseplanane frå Sogn og Fjordane og Hordaland, medan eksisterande felles handlingsprogram for dei to gamle planane har behov for ei rullering. 

Gjeldande handlingsprogram vart vedteke våren 2022 og er basert på dei regoinale folkehelseplanane frå dei tidlegare fylka. Det vart gjort eit stort arbeid med å lande eit felles handlingsprogram som ivaretok mål, delmål, føringar og strategiar frå dei to planane.

Ny Utviklingsplan 2024–2028 med oppdatert kunnskapsgrunnlag, ny regional folkehelseoversikt, endringar i folkehelselova og nye oppgåver på integreringsfeltet gir behov for å styrke den strategiske retninga og samordne arbeidet med folkehelse på tvers av sektorar og forvaltningsnivå i Vestland.