Det nye fylkestinget er konstituert: Askeland klar for fire nye år
Ny fylkesvaraordførar, 36 nye representantar, 4 nye hovudutvalsleiarar, 2 nye parti, og ein gruppeleiar som søkte fritak på dag ein og vende snuten mot Stortinget.
Det var første dag av det konstituerande møtet i fylkestinget kort oppsummert i tal og aktuelle nyheiter. Medan mange var nye, i både verv og fylkestinget generelt, beheld Jon Askeland fylkesordførarkjeda og -klubba i fire år til.
– Takk for tilliten. Eg skal gjere mitt beste og inviterer til samarbeid i heile fylkestinget dei neste fire åra, seier Askeland.
Dei 65 fylkestingsrepresentantane er samla til konstituerande møtet i fylkestinget i Vestlandssalen i Vestlandshuset 17. og 18. oktober.
– Frykt ikkje talarstolen
Men kva betyr eigentleg konstituering? Fylkesordføraren hadde sjekka ordboka og fortalde at det betyr å tre saman, halde det grunnleggjande møtet og velje styre. Askeland gjekk også gjennom ein del formalitetar og praktiske ting.
– Og så vil eg seie til alle: Frykt ikkje talarstolen og frykt ikkje klubba. Ta ordet, kom med framlegg. Politikk er pragmatisme, å foredle framlegg og forbetre dei. Og vi vil alle vinne og tape saker desse fire åra. Då må vi riste det av oss og gå vidare, slo Askeland fast før saksbehandlinga tok til.
Kulturverksemda ZingZang fekk æra av å opna møtet i fylkestinget. Unge utøvarar opptredde med song, dans og teater. Dei hausta stor applaus frå ein fullsett Vestlandssal og fekk blomster frå fylkesordføraren.
Ny fylkesvaraordførar
Det vart altså ingen overrekking av fylkesordførarkjede i dette møtet. Men det skulle veljast ny fylkesvaraordførar. Samarbeidspartia Arbeiderpartiet, Senterpartiet, SV, KrF, Venstre og MDG fremja forslag om Stian Davies som fylkesvaraordførar, eit forslag som fekk fleirtal.
– Dette er stas, og no startar jobben! No skal vi jobbe for å skape eit grønare og meir rettferdig Vestland for alle. Eg ser fram til samarbeid med folk, kommunar og næringsliv for å løfte heile fylket vårt, seier Davies.
Davies har dei siste fire åra vore leiar for hovudutval for kultur, idrett og inkludering.
Nytt fylkesutval
Ein del av formalitetane på eit konstituerande fylkesting er å velje medlemmar til både fylkesutvalet og dei fire hovudutvala. Fylkesutvalet er det nest øvste organet i fylkeskommunen og arbeidsutvalet til fylkestinget. Desse vart valde som medlemmar i fylkesutvalet i perioden 2023–2027:
- Jon Askeland (Sp)
- Stian Davies (Ap)
- Kine Dale (Ap)
- Karianne Torvanger (Ap)
- Aleksander Øren Heen (Sp). Sigrid Brattabø Handegard (Sp) er vara og stiller for Heen som har fått fritak.
- Marthe Hammer (Sv)
- Trude Brosvik (KrF)
- Nils-Anders Nøttseter (MDG)
- Åsta Årøen (V)
- Silja Ekeland Bjørkly (H)
- Noralv Distad (H)
- Kåre Martin Kleppe (H)
- Tora Kildehaug (H)
- Silvia Haugland (H)
- Terje Søviknes (FrP)
- Sigbjørn Framnes (FrP)
- Bjarte Helland (INP)
Fylkesordføraren leiar fylkesutvalet, som har møte kvar månad.
Nye hovudutval med leiarar
Fylkestinget valde også nye medlemmar til alle dei fire hovudutvala i fylkeskommunen og ikkje minst nye leiarar for alle utvala. Blant dei fire nye leiarane finn vi to erfarne fylkespolitikarar, og to som er heilt nye i fylkespolitikken.
Arve Helle (Ap) blir ny leiar for hovudutval for samferdsel og mobilitet, utvalet han var medlem av i førre periode. Åsmund Berthelsen (SV) rykkjer opp frå nestleiar til leiar i hovudutval for opplæring og kompetanse. Jacob Nødseth (V) er ny i fylkestinget og blir leiar for hovudutval for kultur, idrett og inkludering, medan Oddmund Klakegg, også ny i fylkestinget, blir leiar for hovudutval for næring.
Søkte fritak på dag ein
Aleksander Øren Heen, gruppeleiar for Sp, fekk måndag ein overraskande stortingsplass, då Erling Sande vart ny kommunal- og distriktsminister. Heen er vara for Sande i Stortinget og blir no fast representant så lenge Sande er statsråd. Han søkte difor fritak frå fylkestinget på første dag av det første møtet til det nye fylkestinget.
Sigrid Brattabø Handegard blir gruppeleiar for Senterpartiet, og Oddmund Klakegg frå Jølster rykkjer inn i fylkestinget når Heen reiser vidare til Stortinget.
Opplæring for dei folkevalde
Heile 36 av dei 65 representantane i fylkestinget er nye etter valet no i haust. To av partia har heller ikkje vore representerte tidlegare. Det er Industri- og næringspartiet, som kom inn med fire representantar, og Bergenslisten, som har ein.
Store delar av møtet 17. og 18. oktober er sett av til opplæring av dei folkevalde. Det er opplæring i blant anna IKT-sikkerheit og etiske reglar. Fylkesdirektøren orienterte om forholdet mellom administrasjonen og det politiske nivået i fylkeskommunen, og juridisk sjef hadde ein gjennomgang av habilitetsreglane.
Held fram onsdag
Møtet i fylkestinget held fram onsdag 18. oktober, med folkevaldopplæring før lunsj. Då kjem statsforvaltar Liv Signe Navarsete for å orientere om regionalpolitikk i møte med statlege forventningar, og professor Yngve Flo skal snakke endring i det fylkespolitiske handlingsrommet.
Etter lunsj er det sett av tid til ein kort presentasjon av kvar av dei 65 fylkestingsrepresentantane, før dei avsluttar møtet med saksbehandling.
Du kan følgje heile møtet direkte i nett-tv, og lenka til sendinga onsdag 18. oktober blir lagt ut på nettsida til fylkeskommunen på morgonen same dag.