Vestland vil ha større råderett over fylkesvegnettet
Eit samla fylkesutval i Vestland fylkeskommune vil ha større handlefridom over fylkesvegnettet. Dette gjekk dei inn for i sitt svar til ei utgreiing om nasjonale krav og føringar for fylkesvegnettet.
Det er Vegdirektoratet si utgreiing om behov for nasjonale nasjonale føringar og krav for planlegging, utbygging, forvaltning, drift- og vedlikehald av riks- og fylkesvegnettet som no har vore på høyring.
Ber om auka handlefridom
– Fylkeskommunane må ha råderett over tiltak på fylkesvegnettet. Vi må sjølve kunne fastsetje standardar og løysingar på fylkesveg ut i frå lokale behov, i eit nært samarbeid med kommunane, seier fylkesordførar Jon Askeland i Vestland.
I møtet i fylkesutvalet i dag vart det òg vedteke at fylkeskommunen må ha mynde til å fastsette fartsgrensene i fylket.
Då vegadministrasjonen for fylkesvegane vart overført frå Statens vegvesen til fylkeskommunane i 2020, tok fylkeskommunane over ansvaret for både planlegging,
utbygging og drift av fylkesvegnettet. No skal det lagast nasjonale føringar som fastset kva krav sentrale styresmakter skal ha i høve fylkeskommunane som vegeigar.
Fylkesutvalet meiner auka handlefridom for fylkeskommunane bidreg til mellom anna betre tilpassing og ressursbruk. Vegdirektoratet har sett på ulike modellar for statleg styring.
Full økonomisk kompensasjon
– Meininga med regionreforma og overføring av vegadministrasjonen til fylkeskommunane var å styrke lokaldemokratiet og sjølvråderetten vår. Difor må fylkeskommunen sitt handlingsrom rundt eiga fylkesvegnett vektleggjast høgt i nasjonale føringar, seier Askeland. Han legg til at fleire av modellane som er foreslåtte, no går i mot dette.
Fylkesutvalet meiner større råderett til fylkeskommunane kan bidra til betre måloppnåing og meir veg for pengane i utbygging og drift av fylkesvegane.
Dei nemner mange felt i sitt høyringsfråsegn, og peikar mellom anna på at dei store økonomiske utfordringane Vestland får med ny tunnelforskrift ikkje er kompensert.
– Økonomiske konsekvensar for fylkeskommunen grunna endringar i nasjonale føringar må bli kompenserte fullt ut, seier Askeland.
Det er samferdselsdepartementet som i neste fase skal ta stilling til modellane og høyringsinnspela.