Høyring: Planprogram for Regional plan for fornybar energi

I høyringsperioden ønsker vi dykkar innspel på:

• kunnskapsgrunnlaget til dei enkelte fornybare energikjeldene
• problemstillingar som er viktige innan dei føreslegne plantema
• medverknad i planarbeidet
• anna som blir vurdert som viktige innspel i planarbeidet

Eit grunnlag for klimaomstilling i Vestland

Regional plan for fornybar energi skal vere eit av grunnlaga for klimaomstillinga av Vestland fylke. Planen har som oppdrag å fastsette mål om ambisjonsnivå og utbygging av fornybar energi. Dette inneber og eit estimat over kor mykje energi som vil kome frå fornybare energikjelder i løpet av planperioden. Dei fornybare energikjeldene har sitt opphav i naturens eige fornybare krinsløp.

Kraftforsyninga i fylket skal greiast ut. Vestland har høgast kraftproduksjon av fylka i Noreg og eksporterer kraft ut av fylket. Samstundes manglar fleire av kommunane i fylket kraft for vidare vekst og realisering av grøne arbeidsplassar. Planen vil sette retningsliner for fleksibel og sikker kraftforsyning, som er ein viktig føresetnad for vidare grøn verdiskaping i fylket.

Kva er eit planprogram?

Før vi kan ta til å jobbe med sjølve planen skal det utarbeidast eit planprogram. Dette skal gje føringar for planarbeidet. Det vil mellom anna seie føringar i form av overordna mål for arbeidet, kva tema ein skal vektleggje, korleis sikre medverknad og organisere arbeidet.

Planprogrammet har desse viktige føremåla:

• Avgrense val av plantema
• Sikre opplegg for medverknad i planarbeidet
• Avklare trong for utgreiingar

Planen er at endeleg vedtak av planprogrammet skal skje i fylkesutvalet 1. juni.