Lyser ut 20 millionar til grøn næringsutvikling
Har du eit prosjekt som handlar om sirkulærøkonomi, grøne arbeidsplassar eller å utvikle kompetanse? Då må du søke innan fristen 10. mai!
– Midlane skal bidra til at Vestland innan 2033 skal bli det leiande verdiskapingsfylket basert på berekraftig bruk av naturressursar, grøn næringsutvikling og innovasjon, seier Tor Andre Ljosland, leiar av hovudutval for næring.
Kommunar, organisasjonar og forskings- og utviklingsinstitusjonar i Vestland kan søkje. 18. april og 3. mai er det informasjonsmøte om utlysinga.
Utnytte ressursane best mogleg
Fylkeskommunen vil mellom anna prioritere prosjekt som handlar om sirkulærøkonomi. Vestland har stor tilgang på fornybare ressursar frå jord, skog, hav og innan energi. Målet med sirkulær omstilling er å utnytte alle ressursar best mogleg. Dette inneber å lage kretsløp der resirkulering med færre og meir berekraftige ressursar er det sentrale.
– For å få til ei slik omstilling må vi jobbe på tvers av næringar og tradisjonelle verdikjeder, og legge til rette for samarbeid om bruk av ressursar. Til dømes er det viktig å halde oppe matproduksjonen i fylket og legge til rette for at denne produksjonen blir meir klima- og miljøvenleg både i sjø og på land, seier Ljosland.
Grøne arbeidsplassar
Vestland fylkeskommune ønskjer også å støtte prosjekt som handlar om verdiskaping og grøne arbeidsplassar. Sysselsetting og aktivitetar gjennom heile året er nøkkelfaktorar for gode bu- og arbeidsmarknadsregionar i Vestland.
– Det er viktig å ha merksemd på innovasjon og system for innovasjon. Vi må ta alle ressursane i bruk og samarbeide på tvers av ulike sektorar for å sikre verdiskaping i heile fylket. Dette kan til dømes vere tiltak som koplar saman lokalmatproduksjon, kultur, opplevingar og reiseliv, seier Ljosland.
Han legg til at kompetanseutvikling er sentralt for å lukkast med sirkulærøkonomi, verdiskaping og nye grøne arbeidsplassar i fylket.
Rett kompetanse
Eit anna viktig tema som kan få støtte er derfor å utvikle den rette kompetansen for framtidas grøne jobbar.
– Det er avgjerande å ta i bruk ressursane i heile befolkninga, inkludert å gjere dei som står utanfor arbeidsmarknaden relevante for arbeidslivet. Døme på tiltak kan her vere utvikling av utdanningstilbod som er etterspurd av arbeidslivet, mobilisering til auka bruk av slike tilbod og ulike strategiske samarbeid knytt til rekruttering av rett arbeidskraft, seier Ljosland.
Les også saksframlegget om utlysinga frå hovudutval for næring, sjå sak PS 6/2023.