Havbyen Bergen samlar til innsats

– Innsatsen i dette samarbeidsprosjektet skal vidareutvikle Bergen og Vestland sin unike posisjon som verdsleiande havregion. Havnæringa står sterkt i regionen vår og prosjektet skal bidra til vekst og aktivitet framover. Eg gler meg til å ta fatt på arbeidet, seier fylkesordførar Jon Askeland.

Berekraftig hav

Bergen kommune står bak det treårige prosjektet, saman med Vestland fylkeskommune og Universitetet i Bergen. Det er også utvikla eit samarbeid med sentrale aktørar innan nærings-, kunnskaps- og forskingsmiljøa knytt til havet.

Prosjektet har som overordna mål å leie an for eit berekraftig hav. Dette skal oppnåast gjennom å fremme auka samhandling, attraktivitet, berekraftig vekst og kompetanse med Bergen som sentral drivkraft. Bakgrunnnen for prosjektet er at både private og offentlege aktørar i Bergensregionen meiner det er naudsynt med eit prosjekt som kan sikre Bergen sin posisjon som havby. For å nå dei lokale, nasjonale og internasjonale målsettingene om reduserte utslepp er samarbeid og samhandling mellom det offentlege, næringslivet og innbyggjarane i Bergen og Vestland sentralt.

Inngjekk samarbeidsavtale

Sist veke var aktørane i prosjektet samla til årsmøte i Universitetsaulaen i Bergen. Fylkesordførar Jon Askeland har leia eit interimstyre, og orienterte årsmøtet om deira arbeid, som no har resultert i at dei mange aktørane kunne skrive under ei samarbeidsavtale denne dagen. Til saman 40 samarbeidspartnarar frå maritime næringar, forsking for forvaltning har signert avtalen i det unike prosjektet.

Den nye styreleiaren, Askeland, fekk i styret med seg sentrale representantar frå mellom anna Bergen kommune, Universitetet i Bergen, Bergen næringsråd, Havforskningsinstituttet og næringslivet.