Vestlandsrådet satsar på næringslivet

- Vi ønskjer å sikre nasjonale rammevilkår for ny vekst og omstilling, og vi vil legge premissar for nasjonal politikk . Det treng vi ein felles strategi for, seier Per Vidar Kjølmoen, fylkesvaraordfører i Møre og Romsdal (Ap) og leiar for styringsgruppa for ny næringsstrategi.

Nærings- og samfunnsliv på Vestlandet og i Noreg står overfor stor omstilling. Globale trendar som det grøne skifte, urbanisering, sentralisering og ei aldrande befolkning vil påverke også vestlendingen i åra som kjem, påpeikar Kjølmoen.

- Heile verda står i ei brytningstid, ei tid som representerar både utfordringar og moglegheiter langs heile kysten av Vestlandet. Vi i fylkeskommunane ønskjer å ha ei aktiv rolle i arbeidet med å sjå korleis Vestlandet og Noreg kan kome styrka ut av tida vi står i.

Tett involvering av næringslivet

Startskotet for arbeidet gjekk denne veka. Næringslivet vil vere tett på prosessen og styringsgruppa er sett saman med representantar frå heile Vestlandet og frå fleire bransjar.

Kompetanse, samarbeid, sentralisering, busetting og teknologiutvikling var blant tema som vart løfta fram i første møte mellom aktørane, samt vestlendingane si evne til omstilling og tilpassing. Dagleg leiar i GCE Ocean Technology, Owe Hagesæther, ønskjer seg konkrete tiltak.

- Omstillingsevna i industrien på Vestlandet er stor, men vi saknar at regjeringa slår på stortromma i sine satsingar på fornybar energi og andre framveksande havnæringar. Regjeringa må iverksette ei tydelegare og større satsing, slik vi som nasjon gjorde då vi bygde olje- og gassnæringa. Vi må satse der norsk industri har sine fortrinn og vi har mykje verdsleiande teknologi vi kan bygge vidare på.

Han peiker på at Vestlandet må bli vertskapsattraktiv.

- Vi må legge til rette for og evne å tiltrekke oss både viktig kompetanse og investeringar frå dei som kan bidra til omstilling og grøn vekst, seier Hagesæther.

Kjølmoen er glad for at næringslivet engasjerar seg i arbeidet med strategien.

- Vi har tru på tett samarbeid med næringane. Det er viktig at dei har ei tydeleg stemme inn i arbeidet.

Éi felles stemme frå Vestlandet

Ei målsetting med næringsstrategien er å skape ei felles plattform for næringslivet på tvers av fylke og bransjar. Kvar har Vestlandet potensiale for vekst? Kva rammevilkår må til for å oppnå veksten? Dette er blant spørsmåla ein skal finne svar på utover våren. Det er rådgivingsselskapet PwC som har oppgåva med å bistå Vestlandsrådet i arbeidet.

- Eg ønskjer at vi skal stå saman om nokre grep for å skape eit enda sterkare næringsliv på Vestlandet. Vi har både eksportretta næringar og eit reiseliv i internasjonal toppklasse. Det vert viktig å styrke verdiskapinga frå desse i åra som kjem, seier Kjølmoen.

Næringsstrategien skal vere klar i juni.