Høyringsmøte gav gode innspel

Møtet som handla om regionen Sogn, var først i rekka av til saman sju digitale høyringsmøte som finn stad i mars. Planen «Berekraftig verdiskaping – regional plan for innovasjon og næringsutvikling 2021–2033» har høyringsfrist 26. mars. Han skal sette retning for næringslivet i fylket i 12 år framover.

Samarbeid heilt sentralt

- Dette er ein plan som gjeld for heile Vestland. Ambisjonen er at Vestland skal vere det leiande verdiskapingsfylket i landet. For å komme dit, treng vi kvarandre. Samarbeid er altså heilt sentralt for å få dette til, sa Bård Sandal, fylkesdirektør for innovasjon og næringsutvikling i sitt opningsinnlegg.

Han la til at vi treng å omstille oss, både på kort og lang sikt. I første omgang må vi løyse utfordringane som gjeld pandemien. På lengre sikt handlar det om å omstille oss frå oljerelatert verksemd til utsleppsfri industri og meir berekraftig vekst.

- For å få til dette må vi løfte og utvikle det vi allereie er gode på, sa Sandal og trekte fram at vi har verdsleiande industri i Vestland.

Sandal understreka viktigheita av å jobbe strategisk og systematisk for å sikre verdiskaping, arbeidsplassar til alle og utdanning og kompetanse som svarar til behova i arbeidslivet.

Sterke bu- og arbeidsmarknadsregionar

Å bli betre på samarbeid blei også trekt fram som essensielt av ordførar i Vik, Roy Egil Stadheim, ein av fem ordførarar som heldt innlegg på høyringsmøtet.

- Tida med å sitte på kvar si tue når det gjeld næringsutvikling er forbi, sa han, og fortalde korleis Vik er avhengig av sterke bu- og arbeidsmarknadsregionar med relevante utdanningstilbod for å lukkast.

- Å satse på samferdsel og infrastruktur i regionen er svært viktig for å sikre ei ønska utvikling i Vik, sa Stadheim.

Han viste til at dårleg infrastruktur for eksempel gjer at unge må flytte ut tidlegare for å gå på skule eller studere. Infrastrukturen er viktig for å oppretthalde folketalet i kommunen.

Infrastruktur var eit sentralt tema i mange av innlegga og innspela som kom i løpet av møtet. I tillegg var deltakarane innom eit breitt spekter av tema som reiseliv, næingsareal, jordbruksareal og sirkulærøkonomi.

Samfunnsmessige utfordringar

Eitt av innlegga frå næringslivsaktørane i Sogn kom frå Agnar Holen, som i tillegg til å vere styreleiar i Sogn næring, er dagleg leiar i ei elektroverksemd.

- Planen har potensial til å gi ei tydeleg strategisk retning for utviklinga av Vestland. Samtidig ser vi gjerne at han endå tydelegare adresserer dei samfunnsmessige utfordringane vi står overfor i åra som kjem, sa Holen. Han etterlyste også at det må komme tydelegare fram korleis ein kan hjelpe næringslivet i arbeidet for ein grønare industri.

Holen snakka også om utfordringane som gjeld elektrifiseringa av landet, og kom inn på energisparing som eit av fleire viktige tiltak.

- Mykje av energien vi produserer i dag går til spille, sa han, og forklarte at det er viktig med tiltak for å redusere det høge straumforbruket.

Kraftproduksjonen i Sogn er stor og elektrifisering og energi var eit gjennomgåande tema i fleire av innlegga. Mange var opptatt av å behalde ein større del av verdiane frå kraftproduksjonen lokalt.

Tre satsingar

Planen har tre satsingar: grøn næringsutvikling, innovative og inkluderande samfunn, areal til næringsutvikling. Deltakarane på høyringsmøtet blei utfordra til å reflektere omkring ulike spørsmål som blir reist i høyringsutkastet.

Mellom anna er det eit ønske at planen skal kunne fungere som ein overordna plan som for eksempel kan brukast som næringsplan for kommunane, på ein slik måte at til dømes kommunar berre treng utvikle eigne handlingsplanar. Innspela frå kommunane var delte i synet på dette. Representantane frå fylkeskommunen noterte seg dette, og vil følgje opp dialogen med kommunane for korleis planen kan tene som ein overordna plan.

Planen for innovasjon og næringsutvikling skal vedtakast politisk i juni. Det er framleis mogleg å melde seg på eit av dei seks resterande høyringsmøta som skal gjennomførast før høyringsfristen går ut 26. mars. Dei skal handle om regionane Hardanger og Voss, Nordfjord, Bergen, Sunnhordland, Sunnfjord og Nordhordland.