Løyver 1 million til scenarioanalysar om korona i næringslivet

Scenarioanalysane skal knyte saman eksisterande kunnskap om næringslivet, særtrekk ved Vestland, informasjon om korleis samfunnet generelt, og Vestland fylke spesielt, er råka av den pågåande covid-19-krisa og oljeprisfallet.

Treng ei overordna analyse

- Vi har allereie mykje kunnskap om næringslivet i fylket før krisa, og ein del kunnskap om korleis næringslivet har utvikla seg under krisa. Samtidig manglar vi ei god analyse for vegen videre, seier Tor André Ljosland (KrF), leiar i hovudutval for næring.

Han legg til at næringslivet i fylket ikkje ligg på latsida i krisa og at me saman kan komme styrka ut på lang sikt om me våger å satse.

- Analysane skal ta omsyn til potensialet for utvikling i Vestland og sei noko om korleis vi bør ruste oss for framtida, seier Ljosland.

Har gjennomført konkurranse

Vestland fylkeskommune har allereie gjennomført ein konkurranse om utarbeiding av scenarioanalysar for næringslivet i fylket. Utlysinga av konkurransen vart gjort med atterhald om finansiering. Kostnadsramma for oppdraget er på 1,5 million kroner, der Vestland fylkeskommune sin del er inntil 1 million kroner.

Skal førebu næringslivet

Initiativet til scenarioanalysane kom mellom anna frå næringsråd og fleire regionar i Vestland. Dei ville at fylkeskommunen skulle lage ei slik scenarioanalyse for å førebu næringslivet i fylket på den nye kvardagen etter covid-19, og på globale trendar lenger fram i tid – som grøn omstilling.

Scenarioanalysane er ledd i arbeidet med å utarbeide ein regional næringsplan basert på smart spesialisering-metodikken. Kort forklart går «smart spesialisering» ut på å finne nye forretningsområde der dei sterke miljøa i næringslivet kan hevde seg. I metoden, som skal fremje fornying og omstilling, kan myndigheitene ta ei pådrivarrolle for utvikling av nye nisjar og næringsområde. Fleire norske fylkeskommunar bruker metoden som verktøy for næringsutvikling.