FORREGION Vestland - Kommune
Har din kommune utfordringar der du trur forsking kan bidra til utvikling og innovasjon? Ønsker din kommune å komme i gang med forsking? Ta kontakt med ein kompetansemeklar i FORREGION Vestland - Kommune og få gratis hjelp til å finne ut av kva som er rett veg vidare.
Kva gjer kompetansemeklaren?
Kompetansemeklaren kan hjelpe med å avklare behov for forsking og å finne rett finansieringsmoglegheit og forskingspartnar. Tenesta er utan kostnader for din kommune.
Kompetansemeklaren hjelper med å identifisere og konkretisere prosjektidear basert på utfordringar i kommunen. Deretter kan kompetansemeklaren hjelpe med å avklare om kommunen treng forsking for å løyse utfordringane. Du får også hjelp til å identifisere potensielle forskarar som kan bidra og tips om aktuelle finansieringskjelder.
Kompetansemeklaren kan organisere «FoU-møte» for å avklare forskingsbehov knytt til konkrete utfordringar for fleire kommunar innan ein sektor, eit tenesteområde eller ansvarsområde.
Kven er kompetansemeklarar?
FORREGION Vestland - Kommune har knytt til seg fagpersonar på Høgskulen på Vestlandet og Vestlandsforsking som kompetansemeklarar. Dei dekkar eit breitt spekter av fagområde, har erfaring frå forskingsarbeid og samarbeid om å utvikle innovasjonsprosjekt.
Prioritering
Dersom det vert stor etterspurnad etter tenesta, vil vi prioritere kommunar og kommunale ansvarsområde som har lite erfaring med å samarbeide med forskarar, og der fleire kommunar kan samarbeide.
Om FORREGION Kommune Vestland
FORREGION Kommune Vestland er del av fylkeskommunen si langsiktige satsing på mobilisering til meir regionalt retta forsking.
Målet er å auke forskingsinnsatsen som kan styrke innovasjonskraft og tenestetilbod i kommunal sektor. Satsinga skal bidra til verdiskaping og nye grøne arbeidsplassar i heile fylket.
Samarbeid
Vestland fylkeskommune leiar FORREGION Kommune-satsinga og samarbeider med Høgskulen på Vestlandet og Vestlandsforsking. Arbeidet er i hovudsak finansiert av fylkeskommunen, med delfinansiering frå Høgskulen og Vestlandsforsking.